سەرۆككۆماری عێراق: یاسای بودجە چارەسەری كێشەكانی بەغدا و هەولێر دەکات

پەیام 

سەرۆككۆماری عێراق ڕایدەگەیەنێت، كە دەستوور پارێزەری پەیوەندییەكانی نێوان بەغداد و هەولێرە و چارەسەری كێشە داراییەكانیش تەنیا لە ڕێگەی یاسای بودجەوە دەبێت. 

نزار ئامێدی سەرۆككۆماری عێراق لە چاوپێكەوتنێكیدا لەگەڵ كەناڵی حەدەسی سعودی ئاماژەی بەوە كرد "هەندێك كەلێن لە پەیوەندییەكانی نێوان حكوومەتی فیدڕاڵ و هەرێمی كوردستاندا هەن، بەڵام كێشەی سەرەكیی ئێستای هەرێمی كوردستان بۆ پەككەوتنی پەڕلەمان و پێكنەهێنانی حكوومەتی نوێ دەگەڕێتەوە.

سەبارەت بە دۆسیەی گەندەڵی و ڕێكارەكان لەلایەن حكومەتەوە، ناوبراو جەختی كردەوە لەوەی بەرەنگاربوونەوەی گەندەڵی ئیرادەی ڕاستەقینەی حكومەت و پشتیوانیی هەموو سەرۆكایەتییەكانی هەیە و بڕیارێكی بێگەڕانەوەیە و هیچ هێڵێكی سووریش بۆ لێپرسینەوە نییە.

وتیشی: حكوومەت بە ئاڕاستەیەكی نیشتمانی و حەكیمانە كار بۆ كۆكردنەوەی چەك لە دەستی دەوڵەتدا دەكات تاكو بەبێ ڕشتنی خوێن ئاسایشی گشتی بچەسپێت. 

سەبارەت بە پەیوەندییەكانی دەرەوە، نزار ئامێدی ڕایگەیاند: عێراق كار بۆ جێبەجێكردنی ڕێككەوتنی ئەمنی لەگەڵ ئێران و كۆتاییهێنان بە دۆسیەی لایەنە ئۆپۆزسیۆنەكانی ئێران و پارتی كرێكارانی كوردستان و كێشەی شنگال دەكات تاوەكو ڕێگری لە هەر هەڕەشەیەك بۆ سەر دراوسێكان بكرێت. 

سەرۆككۆماری ئاماژەی بەوەش دا "دەرفەتێك بۆ دروستكردنی چوارچێوەیەكی ئەمنیی هەرێمیی بۆ گەشەی ئابووری هەیە كە وڵاتانی ناوچەیی لەخۆ بگرێت و عێراق تێیدا ڕۆڵێكی سەرەكی دەبێت".