وەزارەتى کارەبا: داشکاندنى کرێى کارەبا بەو مەرجەیە هەموو قەرزەکە بە یەکجار بدەیتەوە

پەیام

وەزارەتی کارەبای هەرێمی کوردستان بڕیاریدا بە لێخۆشبوونی سەدا ٥٠ی قەرزە کۆنەکانی پێش پڕۆژەی ڕووناکی، کە لە ٣ی ئابەوە دەستپێدەکات و مەرجی سوودمەندبوونیش دانەوەی تەواوی قەرزەکەیە بەیەکجار. 

بەپێی ڕێنماییەکانی وەزارەتەکە، بڕیارەکە تەنیا قەرزەکانی پێش جێبەجێکردنی پڕۆژەی ڕووناکی دەگرێتەوە و لە نێوان ٣ی ئاب بۆ ١٠ی ئەیلولی ٢٠٢٦ کاری پێدەکرێت. ڕێژەی داشکاندنەکە بۆ هاوبەشانی ماڵان و کشتوکاڵی سەدا ٥٠ دەبێت، لە کاتێکدا بۆ هاوبەشانی پیشەسازی، بازرگانی و حکومی سەدا ٢٥ دیاریکراوە، بەدەر لەو هاوبەشانەی کە فیدەری تایبەتیان هەیە. 

مەرجی سەرەکی بۆ سوودمەندبوون لەم بڕیارە، بژاردنی تەواوی بڕی قەرزە داشکێندراوەکەیە بەیەکجار و بەبێ قیست. وەزارەتی کارەبا ڕێگەی "ئی-پسوولە" ی وەک خێراترین ئامراز بۆ خەرجکردنی پارەکە دیاریکردووە بۆ ڕێگریکردن لە قەرەباڵغی، هەروەها ئاماژەی بەوەشکردووە کە کارمەندانی گەڕۆکی کۆکردنەوەی کرێی کارەبا ناتوانن مامەڵە بەم داشکاندنەوە بکەن. 

بە مەبەستی ئامادەکارییە تەکنیکییەکان بۆ جێبەجێکردنی پرۆسەکە، خزمەتگوزاری پارەدانی کارەبا لە ڕێگەی "ئی-پسوولە" و بنکەکانی فرۆشتنی وزە لە نێوان ٣٠ی تەمموز بۆ ٣ی ئاب بەشێوەیەکی کاتی ڕادەگیرێت. لەبەر ئەوە داوا لە هاوبەشان کراوە پێش وەستانی سیستەمەکە پارەی پسوولەکانی ڕووناکی بدەن. لە قۆناغی داهاتووشدا، سیستەمی ٥٠ ڕۆژە بۆ دانەوەی کرێی کارەبا جێبەجێ دەکرێت.