زیاترلە 43 هەزار کەس لە هەرێم ناویان بۆ فەریزەى حەج تۆمارکردووە

پەیام  

لە ماوەى 10 ڕۆژی کردنەوەی دەرگای ناونووسیندا بە شێوەى ئۆنلاین بۆ فەریزەى حەجى ئەمساڵ تائێستا زیاترلە 43 هەزار کەس ناوی خۆیان بۆ فەریزەی حەج تۆمار کردووە.

بە گوێرەى ئەو لینکەى بەرێوەبەرایەتیی حەج و عومرەی هەرێم بۆ تۆمارکردنى ناوى حاجییان دایناوە، تاوەکو دوانیوەڕۆى ئەمڕۆ 31ى 7ى 2026،  زیاترلە 43 هەزار کەس ناوی خۆیان بۆ فەریزەی حەج تۆمار کردووە.

بەرێوەبەرایەتیی حەج و عومرە ڕۆژی 5ى 8ى  2026 ى وەک دوا وادە بۆ ناونووسین دیاریکردووە، لەدواى ئەو وادەیەش تیروپشکى بۆ ناوى حاجییانى ساڵى 2027 لێ دەکرێت.

ساڵى 2026 پشکی هەرێمی کوردستان بۆ حەج پێنج هەزار و 120 کەس بوو، بڕیارە بۆ ساڵى 2027یش هەمان ژمارە هەڵبژێردرێن.

بەرپرسانى بەرێوەبەرایەتیی حەج و عومرەى هەرێم پێشبینى دەکەن ئەمساڵ زیاترلە 70 هەزار کەس خۆیان بۆ فەریزەى حەجى 2027 تۆماربکەن.