فەرماندەیەكی باڵای ئەمریكا: ناتوانین لە یەك كاتدا بەرگری لە ئەمریكا و ئـ.یسرایل بکەین

پەیام

فەرماندەیەكی باڵای ئەمریكا هۆشداری دەدات كە ناتوانن لە یەك كاتدا بەرگری لە ئیسرائیل و خاكی وڵاتەكەیان بكەن.

ڕۆژنامەی واشنتن پۆست لە زاری چەند بەرپرسێكی ئەمریكییەوە بڵاوی كردووەتەوە، جەنەڕاڵ گرینكی ڤیچ، فەرماندەی هێزەكانی ئەمریكا لە ئەوروپا، هۆشدارییەكی توندی داوەتە وەزارەتی بەرگریی ئەمریكا (پێنتاگۆن)، و ڕایگەیاندووە كە هێزە دەریاییەكانیان ژمارەیان هێندە كەمە كە بەشی ئەوە ناكەن هەم بەرگری لە خاكی ئەمریكا بكەن و هەم ئیسرائیل لە هێرشە مووشەكییە بالیستییەكان بپارێزن.

 گرینكی ڤیچ جەختی لەوە كردووەتەوە، ئەگەر لانیكەم كەشتییەكی تێكشكێنەری دیكە بۆ هێزەكانیان زیاد نەكرێت، ئەوا ناچار دەبن لە نێوان پاراستنی ئاسایشی نیشتمانیی ئەمریكا و بەرگری كردن لە ئیسرائیل، تەنیا یەكێكیان هەڵبژێرن. 

ئەم هۆشدارییە نیشاندەری كێبڕكێیەكی توندە لە نێوان فەرماندە سەربازییەكانی ئەمریكادا بۆ دەستكەوتنی ئەو چەك و كەرەستە سەربازییە سنووردارانەی كە واشنتن لەبەردەستیدایە. 

بەرپرسێكی ئەمریكیش ڕایگەیاندووە كە ئەم جۆرە هۆشدارییانە كاتێك دەدرێن كە فەرماندەكان مەترسییەكی گەورە بۆ سەر بەرژەوەندییەكانی وڵاتەكەیان دەبینن و پێویستیان بە سەرنجی بەرپرسانی باڵای واشنتن هەیە تاوەكو هاوسەنگییەكی نوێ لە دابەشكردنی هێزەكاندا دروست بكەن و ڕێگری لە هەر شكستهێنانێكی ئەمنی بكەن، ئەمەیش كێشەی بۆ ئاسایشی ئیسرائیل و ئەمریكا دروست كردووە.