ئێران بۆ كوشتن یان دیلكردنی هەر سەربازێكی ئەمریكی 30 هەزار دۆلار خەڵاتى دیاریکردووە

پەیام

ئێران بڕی 30 هەزار دۆلار بۆ 60 هەزار دۆلار خەڵات دەدات بە هەر هاووڵاتییەك لە كاتی بەرگریكردن لە وڵاتەكەیدا سەربازێكی ئەمریكی بكوژێت، یان بەدیلی بگرێت. 

لیوا ئەمیر حاتەمی فەرماندەی گشتیی سوپای ئێران لە مەراسیمی "ڕۆژی ڕۆژنامەنووسان"دا ڕایگەیاند: هەر ئێرانییەك لە نێو خاكی وڵاتەكەیدا ڕووبەڕووی هێزەكانی ئەمریكا ببێتەوە، لە ئەگەری كوشتن، یان بەدیلگرتنی هەر سەربازێكدا بڕی 30 هەزار دۆلار خەڵاتی پێ دەدرێت.

ئەو وتیشی: بڕەكە بۆ ژنان دەبێتە دوو بەرانبەر، واتا 60 هەزار دۆلار. 

ئەم بڕیارە وەك هەنگاوێك بۆ هاندانی جەماوەر و بەرپەرچدانەوەیە لە بەرانبەر هەر هێرشێكی سەربازیی ئەمریكادا تا بە پشتیوانی هاووڵاتیان، پارێزگاری لە دەسەڵات بكات.
 
 لە 28ی شوباتی ڕابردووەوە جەنگی نێوان ئەمریكا ـ قەوارەی ئیسڕائیل بۆسەر ئێران دەستی پێكردووە و تائێستاش كوژرانی 18 سەربازی ئەمریكی ڕاگەیەندراوە، بەڵام تاران پێی وایە ژمارەی ڕاستەقینەی زیانە گیانییەكانی ئەمریكا زۆر لەوە زیاترە كە ڕاگەیەنراوە.