گەمارۆدانی ماڵە فەڵەستینییەكان فشاری نێودەوڵەتیی بۆ سەر ئیسرائیل زیاد كرد

پەیام 

جولەكە توندڕەوەكان لە كەناری خۆراوا گەمارۆی سێ ماڵ دەدەن بەمەبەستی ناچاركردنیان بە جێهێشتن، كە 15 كەسیان تێدایەو تەواوی خزمەتگوزاریییان لێ بڕاوە، ئەمریكا و فەرەنساش دژی ئەو هێرشەی زایۆنییەكان هەڵوێستیان نواند.

شارۆچكەی قەسرە لە باشووری نابلس بووەتە چەقێكی نوێی ئاڵۆزییەكان لە كەناری خۆراوای فەڵەستین، دوای ئەوەی نیشتەجێكراوە زایۆنییەكان 3 ماڵی فەڵەستینییان گەمارۆدا و ئاو و كارەبایان لێ بڕین. 

نەتەوە یەكگرتووەكان ڕایگەیاند 15 كەس كە دوو منداڵیان تێدایە لەناو ماڵەكاندا گیریان خواردووە، مەبەست لەم فشارانەش ناچاركردنیانە بە جێهێشتنی زەوییەكانیان بۆ نیشتەجێبووەكان.

ئەم ڕووداوە ئەمریكا و فەرەنسای هێنایە سەر هێڵ و داوایان لە حكومەتی قەوارەی ئیسرائیل كرد دەستبەجێ هێرشەكان ڕابگرێت. 

كۆشكی سپی فشار دەخاتە سەر نەتەنیاهوو بۆ سەركۆنەكردنی فەرمیی ئەم گەمارۆیە، بەتایبەت كە خاوەنی یەكێك لە ماڵەكان ڕەگەزنامەی ئەمریكی هەیە. 

سوپای زایۆنی ڕایگەیاند هێزی ناردووەتە ناوچەكە و لێكۆڵینەوە لە ڕەفتاری سەربازەكان و نیشتەجێبووەكان دەكات. 

هاوكات، لە قودس نزیكەی 70 هەزار كەس لەژێر ڕێكاری توندی ئەمنیدا نوێژی هەینییان لە مزگەوتی ئەقسا ئەنجام دا.