1 کاتژمێر پێش ئێستا
34 جار خوێنراوەتەوە
حزبوڵڵای لوبنان: سزاكانى ئەمریکا لە بژاردەی بەرەنگاریی ساردمان ناكاتەوە
پەیام
حزبوڵڵای لوبنانی وەڵامی دووپاتكردنەوەی ناوبردنی بە تیرۆریست لەلایەن ئەمریكاوە دەداتەوە و ڕایدەگەیەنێت: سزاكان و پۆلێنەكان لە بژاردەی بەرەنگاریی ساردمان ناكاتەوە.
حیزبوڵڵای لوبنانی لە ڕاگەیەنراوێكدا وەڵامی سزاكانی ئەمریكا و ناوبردنەوەی سەرلەنوێ بە ڕێكخراوێكی تیرۆریستی كە خزمەتی ئێران دەكات، دایەوە و بڵاوی كردەوە "شانازی بە پەیوەندی لەگەڵ ئێران دەكات و پەیوەندییەكانیان برایەتی و پتەوە".
لە ڕاگەیەنراوەكەدا ئاماژە بەوە كراوە ئەو بڕیارە بەشێكە لە سیاسەتی ئەمریكا بۆ بە ئامانجگرتنی بەرەی بەرەنگاری و فشاركردن لێیان لە ڕووی سیاسی و دارایی و ئەمنی بۆ پاراستنی قەوارەی زایۆنی و چەسپاندنی داگیركارییەكانی لە باشووری لوبنان.
حیزبوڵڵای لوبنانی دەڵێت: ئەمریكا لەبری ئەوەی قەوارەی زایۆنی ناچار بكات لە باشووری لوبنان بكشێتەوە و دەستدرێژییەكانی ڕابگرێت، هەوڵی دورستكردنی پێشوی لە نێوخۆی لوبنان دەدات.
ڕۆژى 20ى 8ى 2026 وەزارەتی خەزێنەی ئەمریكا جارێكی دیكە و بە بڕیاری ژمارە 13224ی هەمواركراو حزبوڵڵای لوبنانی بە قەوارەیەكی تیرۆریستی جیهانیی پۆلێن كردەوە كە كار لە بەرژەوەندی فەیلەقی قودسی سوپای پاسداران دەكات.
لە تۆڕە کۆمەڵایەتیەکان شەیری بکە