جووڵەی كەشتیوانیی لە گەرووی هورمز بۆ 4% دابەزیوە

پەیام 

بەراورد بە پێش هێرشەكانی ئەمریكا بۆ سەر ئێران جووڵەی كەشتیوانیی لە گەرووی هورمز بۆ 4% دابەزیوە.

دەستەی ئۆپڕاسیۆنە دەریاییەكانی بەریتانیا ڕایگەیاند: بەراورد بە پێش هێرشەكانی ئەمریكا بۆ سەر ئێران لە 28ی شوبات، جووڵەی كەشتییەكان لە گەرووی هورمز بۆ 4% دابەزیوە.

ئەم ئامارە نوێیە لە ڕاپۆرتێكی هەفتانەدا هاتووە كە تاوەكو 7ی ئابی ئەمساڵ دەخایەنێت و ناوچەكانی دەریای سوور و عومان دەگرێتەوە.

بەپێی ڕاپۆرتەكە "لە حەوت ڕۆژدا تەنیا 18 كەشتی بەرەو دەرەوە و 21 كەشتی بەرەو ناوەوە تێپەڕیون. كۆی گشتی تێپەڕبوونی كەشتییەكان لە سەرەتای جەنگەوە گەیشتووەتە 857 كەشتی بەرەو دەرەوە و 593 كەشتی بەرەو ناوەوە". 

دەستە بەریتانییەكە ئەم دابەزینە توندەی جووڵەی كەشتیوانیی لە گەرووی هورمز بە نیشانەی كاریگەرییە گەورەكانی ململانێ سەربازییەكان لەسەر بازرگانی جیهانی و هاتوچۆی دەریایی لە ناوچەكەدا لێك دەداتەوە.

سەبارەت بە ئاماری ڕووداو و ئەو زیانانەی بەر كەشتییەكانیش كەوتوون، ڕاپۆرتەكە دەریدەخات كە لە سەرەتای ئەمساڵەوە 74 ڕووداو و 88 حاڵەتی هۆشدارییدان و 34 چەتەییش تۆمار كراوە، لەو میانەیەشدا 54 ڕاپۆرت لە زیانگەیاندن بە كەشتیی دراوە و 23 حاڵەتی مردن و برینداریش تۆمار كراوە.