لە شەڕی هێزەكانی حكومەتی یەمەن و حووسییەكاندا 80 كەس كوژران

پەیام 

جارێكی دیكە ئاگری جەنگ لە یەمەن هەڵگیرسایەوە، لە پێكدادانێكی قورسدا لە نێوان چەكدارانی حوسی و هێزەكانی حكومەت، زیاتر لە 80 كەس لە هەردوو لا كوژران.
 
سەرچاوە سەربازییەكانی حكومەتی یەمەن ئاشكرایان كرد كە لە میانی شەڕ و پێكدادانەكانی ڕۆژانی پێنجشەممە و هەینیدا، 39 سەربازیان لە ناوچەكانی كەناراوەكانی دەریای سوور، بەتایبەتی لە گوندەكانی حودەیدە وەعز گیانیان لەدەست داوە.

لە بەرانبەردا، سەرچاوە پزیشكییەكان لەو ناوچانەی كە لەژێر كۆنترۆڵی حوسییەكانن لە پارێزگاكانی ئیب و تەعز، پشتڕاستیان كردەوە كە نەخۆشخانەكان تەرمی 42 چەكداری حوسییان وەرگرتووە كە لەو شەڕانەدا كوژراون. 

بەپێی زانیارییە سەربازییەكان، ئەم خولە نوێیەی جەنگ دوای ئەوە دەستی پێ كرد كە حوسییەكان بە پاڵپشتیی فڕۆكەی بێفڕۆكەوان و مووشەكی بالیستی، هێرشێكی زەمینیی فراوانیان كردە سەر پێگەكانی حكومەت لە ڕۆژئاوای تەعز و توانیان پێشڕەوی بكەن. 

ئەم پەرەسەندنە بە سەختترین ڕووبەڕووبوونەوە دادەنرێت لە نێوان هەردوو لادا لە دوای ئاگربەستەكەی نیسانی 2022ـەوە. پێشتریش حكومەتی یەمەن هۆشداریی دابوو كە حوسییەكان پیلانیان داناوە بۆ كۆنترۆڵكردنی كەناراوەكانی بابولمەندەب.