لوبنان. لە هێرشێکی ئاسمانییدا ١٠ کەس کوژران و داوای چۆڵکردنی چەند ناوچەیەکیش کرا

پەیام
لە ئەنجامی هێرشە ئاسمانییەکانی ئەمــڕۆی ئیسرائیل بۆ سەر باشووری لوبنان، ١٠ کەس کوژران و ٧ی دیکەش بریندار بوون، هاوکات هۆشداری چۆڵکردنی چەند ناوچەیەکی دیکەش دراوە. 
بەپێی لێدوانی بەرگریی شارستانیی باشووری لوبنان، قوربانییەکان بەهۆی دوو هێرشی ئاسمانییەوە بوون کە بەرەبەیانی ئەمڕۆ کراونەتە سەر شارۆچکەی کفڕومان. هاوکات ئەوەش پشتڕاست کراوەتەوە کە ئیسرائیل دوو هێرشی دیکەی ئاسمانیی کردووەتە سەر هەردوو شارۆچکەی عەرەب سەلیم و نەبەتیەی سەروو لە باشووری لوبنان. 
لە لایەکی دیکەوە، وتەبێژی سوپای ئیسرائیل هۆشدارییەکی بەپەلەی ئاراستەی دانیشتووانی شارۆچکەی دێر زەهرانی لە قەزای نەبەتیە کردووە. لە هۆشدارییەکەدا داوا لە دانیشتووانی باڵەخانەیەک دەستبەجێ شوێنەکانیان جێبهێڵن. 
بەگوێرەی ڕاگەیەندراوەکەی سوپای ئیسرائیل، ئەو باڵەخانەیە دەکەوێتە نزیک دامەزراوەیەکی سەر بە حزبوڵڵای لوبنانی کە هێزەکانیان بەنیازن هێرشی بکەنە سەر. لەپێناو پاراستنی سەلامەتیی هاووڵاتییان و خێزانەکانیان، داوایان لێ کراوە بە خێرایی شوێنەکە چۆڵ بکەن و لانی کەم بە دووریی ٣٠٠ مەتر لێی دوور بکەونەوە.