له‌ چه‌ند ڕۆژی ڕابردوودا له‌ یه‌مه‌ن نزیكه‌ی ٣٠٠ كه‌س كوژراون

دەیان هێرشی ئاسمانی کرایە سەر بنکەکانی حووسییەکان لە چەندین پارێزگای یەمەن، هاوکات بەهۆی پێکدادانەکانی ڕۆژانی دواییدا زیاتر لە ٣٠٠ کەس کوژراون. 
سەرچاوە یەمەنییەکان ئاشکرایان کرد کە هێرشە ئاسمانییەکان سەربازگە، کۆبوونەوە و مۆڵگەکانی حووسییەکانیان لە پارێزگاکانی بەیدا، مەئریب، زالـع، تەعز و حودەیدە کردووەتە ئامانج. بەپێی سەرچاوەکان، بەشە هەرە گەورەی هێرشەکان سەربازگەی حووسییەکانی لە پارێزگای بەیدا پێکاوە، لەگەڵ بەئامانجگرتنی شوێنەکانیان لە ناوچەکانی جووبە، عەبدیە و سرواح لە مەئریب، هاوکات سەنگەرەکانیان لە پارێزگای زالـع بوردومان کراون. 
ئەو سەرچاوانە ئاماژەیان بەوەش کرد کە هێرشی ئاسمانیی سنووردار کراوەتە سەر کۆبوونەوەی حووسییەکان لە ناوچەی مەقبەنە لە ڕۆژئاوای تەعز و جەبەل دەباس لە ناوچەی حەیس لە پارێزگای حودەیدە. 
لە لایەکی دیکەوە، لە چەند ڕۆژی ڕابردوودا شەڕ و پێکدادانی سەخت لەنێوان چەکدارانی حووسی و هێزەکانی حکومەت لە ناوچە جیاجیاکانی یەمەن ڕوویداوە. ئەم ڕووبەڕووبوونەوانە کە لە باشووری ڕۆژئاوای وڵاتەکە چڕ بوونەتەوە، بوونەتە هۆی کوژرانی زیاتر لە ٣٠٠ کەس و هەڵاتنی دەیان خێزان لە ماڵەکانی خۆیان. 
دوو سەرچاوەی سەربازی لە هێزەکانی حکومەت بە ئاژانسی دەنگوباسی "فرانس پرێس" یان ڕاگەیاندووە، ٨٤ لە چەکدارەکانیان لەنێوان نیوەڕۆی شەممە تا بەیانیی یەکشەممە کوژراون. لەبەرانبەردا، چوار سەرچاوە لە لایەنی حووسییەکان پشتڕاستیان کردووەتەوە کە ٥٧ چەکداریان لە هەمان ماوەدا کوژراون.