یسرائیل کاتس: فەرمانمان بە سوپا کرد خۆی بۆ شەڕێکی گشتگیر ئامادە بکات

پەیام

بەرپرسانی باڵای ئیسرائیل فەرمانیان بە سوپا کردووە بۆ شەڕێکی گشتگیر لە کەناری ڕۆژاوا ئامادە بێت. 

دەستەی پەخشی ئیسرائیل لە زاری ییسرائیل کاتس، وەزیری بەرگرییەوە بڵاوی کردەوە، کە لەگەڵ بنیامین نەتانیاهۆی سەرۆکوەزیران، فەرمانیان بە سوپا کردووە خۆی بۆ "شەڕێکی گشتگیر دژی تیرۆر" لە کەناری ڕۆژاوا ئامادە بکات. کاتس هەڕەشەی ئەوەشی کردووە کە ئەگەر ئامادەکاریی بۆ هێرشێکی هاوشێوەی حەوتی ئۆکتۆبەر پشتڕاست بکرێتەوە، ئەوا شەڕێکی فراوان بەرپا دەکەن. ناوبراو جەختی لەوەش کردەوە کە ڕێگە نادەن ڕاپەڕینێک لە کەناری ڕۆژاوا دروست بێت کە ساڵانێک بخایەنێت، بەڵکوو کار دەکەن بۆ ئەوەی بە خێرایی و بە یەکجاری کۆتایی بە ڕووبەڕووبوونەوەکان بهێنن. 

لە لایەکی دیکەوە، بنیامین نەتانیاهۆ هەڕەشەی بەردەوامبوونی پرۆسەکانی کرد بۆ لەناوبردنی ئەوانەی بە "تێکدەر" ناوی بردن، لەگەڵ ڕاوەدوونانی ئەو لایەنانەی کە ڕەوانەیان دەکەن. هەروەها جەختی لە خاپوورکردنی تەواوەتیی ژێرخانی "تیرۆر" لە کەناری ڕۆژاوا کردەوە. 

ئەم پێشهاتانە لە کاتێکدان کە هێرش و توندوتیژییەکانی ئیسرائیلییەکان لە کەناری ڕۆژاوا بە شێوەیەکی بێپێشینە زیادیان کردووە، کە بە وتەی سەرچاوەکان لەژێر پاراستنی سوپای ئیسرائیلدا ئەنجام دەدرێن.