1 کاتژمێر پێش ئێستا
156 جار خوێنراوەتەوە
ژاپۆن لە نەخشە نوێیەكەی جیهان ناڕازییە و داوای پێداچوونەوە و چاككردنی دەكات
پەیام
ژاپۆن بە فەرمی ناڕەزایەتیی خۆی گەیاندە نەتەوە یەكگرتووەكان لەسەر نەخشە نوێیەكەی جیهان كە كۆمەڵەی گشتی پەسەندی كردووە، ئەمەش بەهۆی تۆماركردنی دوورگەكانی "كوریل"ی كێشەلەسەر لەگەڵ ڕووسیا، وەك بەشێك لە سنووری ئەو وڵاتە و داوای چاككردنەوەی دەكات.
مینۆرۆ كیهارا، وتەبێژی حكومەتی ژاپۆن ڕایگەیاند، كە وڵاتەكەی لە ڕێگەی كەناڵە دیپلۆماسییەكانەوە ناڕەزایەتییەكەی پێشكەش كردووە، بە مەبەستی ڕێگریكردن لە بڵاوبوونەوەی چەمك و تێگەیشتنە هەڵەكان دەربارەی خاك و ناوی جوگرافیی ناوچەكانی ژاپۆن.
كۆمەڵەی گشتی نەتەوە یەكگرتووەكان هەفتەی ڕابردوو وەشانی نوێی نەخشەكەی پەسەند كردبوو، كە تێیدا ئەفریقا بە ڕووبەرێكی گەورەتر بەراورد بە نەخشەكانی پێشوو و ئەمریكای باكوور و ئەورووپا بە ڕێژەیی بچووكتر دەردەكەون، ئەمەش ناڕەزایەتی و ڕەخنەی ئەمریكاشی لێكەوتەوە.
مێژووی ناكۆكییەكە بۆ ساڵی 1945 دەگەڕێتەوە، كاتێك یەكێتیی سۆڤیەت دەستی بەسەر دوورگەكاندا گرت و دانیشتووانە ژاپۆنییەكانی دەركرد.
گرژییەكانی مۆسكۆ و تۆكیۆش لەم دواییانەدا دوای سەردانی ڤلادیمێر پوتینی سەرۆكی ڕووسیا بۆ دوورگەكان توندتر بوون؛ لەكاتێكدا ژاپۆن سەردانەكەی بە هەنگاوێكی "قبووڵنەكراو" ناوبرد، مۆسكۆ سەرجەم داواكارییەكانی تۆكیۆی ڕەتكردەوە و بە تەواوەتی بێ بنەمای یاسایی لەقەڵەمی دان.
لە تۆڕە کۆمەڵایەتیەکان شەیری بکە