پێنج وڵاتی ئەورووپی كار بۆ گواستنەوەی كۆچبەران بۆ ئەفریقا دەكەن

پەیام 

دوای شكستهێنانی هەنگاوێكی هاوشێوە لە بەریتانیا، پێنج وڵاتی دیكەی ئەورووپی ڕێككەوتنێك بۆ گواستنەوەی كۆچبەران بۆ كیشوەری ئەفریقا واژوو دەكەن.

یۆنان، ئەڵمانیا، نەمسا، دانیمارك و هۆڵەندا ڕێككەوتن لەسەر داڕشتنی چوارچێوەیەكی هاوبەش بۆ دەركردن و گواستنەوەی ئەو پەنابەرانەی داواكارییەكانیان بۆ مافی پەنابەریی ڕەت كراوەتەوە.

بەپێی زانیارییەكانی دەزگا هەواڵگری و ڕاگەیاندنە نێودەوڵەتییەكان، ئەم هەنگاوەی ئەم پێنج وڵاتە ئەوروپییە دوای پەیڕەوكردنی سیاسەتێكی هاوشێوە دێت لەلایەن ئیدارەی ویلایەتە یەكگرتووەكانی ئەمریكاوە. 

بەرپرسانی دانیمارك و یۆنان ئاماژەیان بەوە كردووە كە پڕۆژە سەرەتاییەكان لە نیوەی یەكەمی ساڵی داهاتووەوە دەست پێدەكەن و وڵاتانی كیشوەری ئەفریقا، بەتایبەت «ڕواندا»، وەك پەناگە و مەڵبەندێك بۆ جێگیركردنی ئەو كۆچبەرانە دەستنیشان كراون.

ئەم ڕێككەوتنە لە كاتێكدایە كە ڕێكخراوە نێودەوڵەتییەكانی مافی مرۆڤ هۆشداری لە پێشێلكردنی یاسا نێودەوڵەتییەكان و بنەمای «نەگەڕاندنەوەی زۆرەملێ» دەدەن، بەڵام بڕیار بەدەستانی یەكێتیی ئەورووپا ئەم سیاسەتە بە ڕێكارێكی گرنگ بۆ ڕێگری لە كۆچی نایاسایی و كۆنتڕۆڵكردنەوەی سنوورەكان هەژماردەكەن.

پێشتریش بەریتانیا هەنگاوێكی لەم شێوەیەی هەڵگرت، بەڵام سەرەڕای خەرجكردنی نزیكەی یەك ملیار دۆلار نەتوانرا هیچ پەنابەرێك بەزۆر ڕەوانەی وڵاتی سێیەم بكرێت و پڕۆژەكە شكستی هێنا.