سووریا تاوتوێی ناردنی سەرباز بۆ هاوکاریکردنی سعوودیە دەکات

ئاژانسی ڕۆیتەرز ئاشکرای کرد کە سووریا تاوتوێی پێشکەشکردنی هاوکاریی سەربازی بە سعوودیە دەکات بۆ ڕووبەڕووبوونەوەی هێرشەکانی گرووپی حوسی لە یەمەن، کە ئەگەری ناردنی هێزی بەرگری یان هێرشبەر لەخۆدەگرێت. 
بەپێی ڕاپۆرتێکی هاوبەشی ئاژانسی ڕۆیتەرز و ماڵپەڕی ئاکسیۆسی ئەمریکی لە زاری بەرپرسێکی ئەمریکی و سەرچاوەیەکی سەربازیی سووریاوە، بژاردەکان بریتین لە ناردنی هێزی سووری بۆ یەمەن بە مەبەستی پاراستنی خاکی سعوودیە، یاخود جێگیرکردنی یەکەی سەربازیی هێرشبەر بۆ پشتیوانیکردنی هێزەکانی حکوومەتی یەمەن لە شەڕی دژ بە حوسییەکان. بەرپرسە ئەمریکییەکە ئاشکرای کرد کە ڕیاز بە فەرمی داوای لە دیمەشق کردووە هێز بۆ بەشداریکردن لەو شەڕەدا بنێرێت، ئەمەش هاوکاتە لەگەڵ پەرەسەندنی هێرشەکانی سەر ناوچە سنوورییەکان و بنکە ئابوورییەکانی شانشینەکە. 
لەبەرانبەردا، دیپلۆماتکارێکی سووری ڕایگەیاند دیمەشق لەبەرانبەر ئەو پەلامارانەدا لە پاڵ سعوودیە دەوەستێت، بەڵام لە ئێستادا ئەرکی سەرەکیی سووریا چاکبوونەوەی ناوخۆیی و ئاوەدانکردنەوەی وڵاتە لە دوای جەنگ، و هەر هەنگاوێکی لەو شێوەیەش تەنیا لە ڕێگەی کەناڵە فەرمییەکان و ڕێککەوتنی دووقۆڵییەوە جێبەجێ دەکرێت. ئەم پێشهاتە لە کاتێکدایە کە پەیوەندییەکانی نێوان هەردوو وڵات لە دوای سەردانە فەرمییەکەی سەرۆککۆماری سووریا ئەحمەد شەرع بۆ ڕیاز بەرەوپێشچوونی خێرای بەخۆوە بینیوە، لە چوارچێوەی هەوڵە هاوبەشەکان بۆ داڕشتنەوەی هاوپەیمانێتییە ئەمنییەکان و کەمکردنەوەی هەژموونی هێزە چەکدارە نەیارەکان لە ناوچەکەدا.