1 کاتژمێر پێش ئێستا
153 جار خوێنراوەتەوە
حوسییەکان پێشڕەویی سوپای یەمەن ڕەتدەکەنەوە
حوسییەکان پێشڕەویی سوپای یەمەن ڕەتدەکەنەوە و باس لە کوژرانی سەدان سەرباز دەکەن
وتەبێژی سەربازیی حوسییەکان پێشڕەویی هێزەکانی حکوومەتی یەمەنی لە ناوچەکانی ژێر دەسەڵاتیان ڕەت کردەوە و ڕایگەیاند گورزی قورسی گیانی و ماددییان لە هێزەکانی نەیاریان داوە.
لە بەیاننامەیەکی فەرمیدا، عەمید یەحیا سەریع وتەبێژی سەربازیی حوسییەکان ڕایگەیاند هێزەکانیان دەستیان بەسەر سەرجەم دەستکەوتە مەیدانییەکانیاندا گرتووە و هەواڵی پێشڕەویی هێزەکانی حکوومەتی بە "بانگەشەی ساختە" وەسف کرد. سەریع دەڵێت: بە دەیان هێرش جووڵەی ئەو هێزانەیان لە ناوچەکانی ڕەئس عارە و سوقیا کردووەتە ئامانج و لە چەند کاتژمێری ڕابردوودا زیاتر لە ٢٠٠ کەسی سەر بە هێزەکانی سعودیە کوژراون و بریندار بوون، هاوکات قەبارەی زیانەکانی نەیارانی بە تایبەت لە ڕووی لەناوبردنی ئۆتۆمبێل و کەرەستەی سەربازی بە بێوێنە لە قەڵەم دا.
وتەبێژی سەربازیی حوسییەکان ئەوەشی خستەڕوو کە هێرشی هاوشێوەیان لە ڕۆژهەڵاتی پارێزگای جەوف و دەوروبەری ناوچەی ڕەغوان لە مەئریب ئەنجام داوە کە بووەتە هۆی سووتانی ژمارەیەک ئۆتۆمبێلی سەربازی و کوژرانی سەربازان، هەروەها ڕاوەدوونانی هێزە کشانەوەکان لە ناوەکانی پارێزگای تەعز بەردەوامە.
ئەم لێدوانەی حوسییەکان وەک وەڵامێک دێت بۆ ئۆپەراسیۆنی "بەرەبەیانی یەمەن" کە لەلایەن سوپای یەمەن و هاوپەیمانیی عەرەبییەوە بە سەرۆکایەتیی سعوودیە دەستی پێ کردووە، کە تێیدا ڕزگارکردنی گەروی بابولمەندەب و شاری کەناراوی موخا لە ڕۆژئاوای تەعز ڕاگەیەندرا بوو.
لە تۆڕە کۆمەڵایەتیەکان شەیری بکە