ئەمریكا.. هەڵكوترایە سەر ماڵی پەرلەمانتارێكی موسوڵمانی سەربە دیموكراتەكان

پەیام

بە پاساوی لێكۆڵینەوە لە ڕێوشوێنەكانی كۆچبەری، دەسەڵاتدارانی فیدراڵیی ئەمریكا، هەڵیان كوتایە سەر ماڵی پەرلەمانتارێكی موسڵمانی سەربە دیموكراتەكان.

میدیاكان لە زاری سێ سەرچاوەی ئاگادارەوە ئاشكرایان كردووە، هەڵكوتانە سەر ماڵی ئیلهان عومەر، پەرلەمانتاری دیموكراتەكان لە چوارچێوەی لێكۆڵینەوەیەكی بەرفراواندایە سەبارەت بە بەڵگەنامەكانی كۆچكردنی بۆ ئەمریكا، لەپێناو دۆزینەوەی بەڵگەیەك لەسەر ئەگەری پێشكەشكردنی زانیاریی نادروست لەلایەن خۆی یان ئەندامانی خێزانەكەیەوە لە كاتی ڕێكارەكانی پەنابەری یان وەرگرتنی ڕەگەزنامەدا.

لە بەرانبەردا، ئیلهان عومەر تۆمەتەكانی ڕەت كردەوە و ڕێكارەكەی بە «تۆقاندنی سیاسی» وەسف كرد، لە كاتێكدا نیگەرانی هەیە لە بەكارهێنانی دەزگا ئەمنییەكان دژی نەیارانی دۆناڵد ترەمپ پێش هەڵبژاردنەكانی مانگی داهاتوو. 

سەرچاوەكان ئاماژەیان بەوەیش كردووە، وەزارەتی داد بەدواداچوون بۆ كەیسەكە دەكات، بەڵام وەرگرتنەوەی ڕەگەزنامە و دەركردنی ئیلهان عومەر لە وڵات ڕەنگە ئامانجی لێكۆڵینەوەكان بن.

ئیلهان عومەر ساڵی 1995 وەك پەنابەرێكی سۆماڵیی موسڵمان گەیشتە ئەمریكا و ساڵی 2000 بووە خاوەنی ڕەگەزنامە، هەروەها لە ساڵی 2018دا بووە ئەندامی كۆنگرێس.

ناوبراو بەوە ناسراوە دژایەتیی توندی سیاسەتەكانی ترەمپ دەكات بەتایبەتیش لە هاوكاریكردنی ئیسرائیل لە شەڕی غەززە و یاساكانی كۆچبەری.