1 کاتژمێر پێش ئێستا
38 جار خوێنراوەتەوە
ئێران: ڕێگە بە كەشتییەكانی ئەمریكا نادەین جارێكی دیكە بگەڕێنەوە كەنداو
پەیام
فەرماندەی سوپای ئێران ڕایگەیاند: ڕێگە بە كەشتییە جەنگییەكانی ئەمریكا نادەین جارێكی دیكە بگەڕێنەوە كەنداو و مەترسی بۆ وڵاتەكەمان دروست بكەن.
عەلی عەبدوڵڵاهی، سەرۆكی ئەركانی سوپای ئێران و فەرماندەی بارەگای ناوەندیی خاتەمولئەنبیا، ڕایگەیاند: هێزە چەكدارەكانمان كەشتیگەلی ئەمریكایان ئیفلیج كردووە و چیتر توانای نزیكبوونەوەیان لە ئاوەكانی ناوچەكە نەماوە.
ناوبراو جەختی كردەوە لەوەی گەڕانەوەی سەربازیی ئەمریكا بۆ كەنداو بەتەواوی مەحاڵە و تاران ڕێگە نادات واشنتۆن ئامادەیی خۆی بۆ دروستكردنی هەڕەشە بەدەست بهێنێتەوە.
عەبدوڵڵاهی هاوكات بە توندی ڕەخنەی لە لێدوانەكانی دۆناڵد ترەمپ سەرۆكی ئەمریكا سەبارەت بە وێرانكردنی دامەزراوە ئەتۆمییەكان گرت و بە دژبەرییەكی ناو برد، چونكە لەلایەك باسی تێكشكاندنی تواناكان دەكات و لەلایەكی دیكەوە بەردەوام هۆشداری لە مەترسییەكانی بەرنامە ئەتۆمییەكە دەدات!
هەر لەو میانەیەدا سەرۆكی ئەركانی سوپای ئێران ڕایگەیاند: ئەگەر توانای ئێرانتان پێكاوە، بۆچی كەشتییە ماندووەكانتان و هێزە سەربازییە ترسنۆكەكانتان ناوێرن لە گەرووی هورمز و سنووری ئاوی و وشكانی ئێران نزیك ببنەوە؟!
وتیشی: ئەم دەنگۆیانە تەنیا بۆ فریودانی ڕای گشتیی نێوخۆی ئەمریكایە.
لە تۆڕە کۆمەڵایەتیەکان شەیری بکە