خەڵكی هەڵەبجە و میوانانی فیستیڤاڵی هەنار نوێژی هەینییان پێكەوە ئەنجامدا

پەیام

وێڕای قەرەباڵخی و جەنجاڵیی زۆری فیستیڤاڵی هەنار لە پارێزگای هەڵەبجە، خەڵكی شارەكە و میوانانی فیستیڤاڵەكە نوێژی هەینییان بە كۆمەڵ ئەنجامدا، ئەمەش وەك یەكێك لە سیما هەرە جوان و سەرنجڕاكێشەكانی ئەو بۆنە جەماوەرییە تۆمار كرا.
لە میانی بەڕێوەچوونی ڕۆژانی فێستیڤاڵی هەنار لە پارێزگای هەڵەبجەدا، كە ساڵانە بە هەزاران گەشتیار لە سەرجەم شار و ناوچە جیاوازەكانەوە ڕووی تێدەكەن، بەشداربووان و سەردانیكەران لە كاتی نوێژی هەینیدا سەرقاڵی و بازاڕكردنیان ڕاگرت بە مەبەستی بەجێهێنانی ئەركە ئایینییەكەیان.
ئامادەبووانی ئەو مەراسیمە جەماوەرییە، كە پێكدەهاتن لە دانیشتووانی ناوخۆی هەڵەبجە و میوانانی هاتووی فێستیڤاڵەكە، بە یەكڕیزی لە گۆڕەپانی بۆنەكەدا ڕیزەكانیان بەست و نوێژی پیرۆزی هەینییان بە شێوەیەكی بەكۆمەڵ بەجێهێنا، بەبێ ئەوەی قەرەباڵخیی لەڕادەبەدەر و جەنجاڵیی ڕێڕەوەكان ببێتە هۆی لەبیركردنی نوێژەكانیان.
ئەنجامدانی نوێژی بە كۆمەڵ لە فیستیڤاڵەكەدا وەك یەكێك لە سیما هەرە جوان و ناوازەكانی فێستیڤاڵی هەڵەبجە وەسف دەكرێت، كە تێیدا پابەندییە ئایینییەكان و نەریتە كۆمەڵایەتییەكان لەگەڵ كەرنەڤاڵێكی كولتووری و ئابووریدا ئاوێتە بوون و دیمەنێكی ڕۆحیی تایبەتیان خولقاندوە.