موجتەبا خامنەیی: شەڕ دەستپێبكاتەوە، ئێمە كات و مەرجی كۆتایی دیاری دەكەین

پەیام  
ڕێبەری ئێران فەرمانی هۆشداری دا كە گەر هێرشە سەربازییەكان دژی وڵاتەكەی دەست پێبكاتەوە ئەوا ئەوان كات و مەرجی كۆتاییهاتنی شەڕ دیاری دەكەن.
ماڵپەڕی فەرمی ڕێبەری ئێران بڵاوی كردەوە: موجتەبا خامنەیی لە كۆبوونەوەی لەگەڵ فەرماندە باڵاكانی هێزە چەكدارەكانی وڵاتەكەیدا، ڕێنمایی ستراتیژیی نوێی دەركرد كە نوێكردنەوەی بانكی ئامانجەكان و پەرەپێدانی توانای بەرگری لەخۆ دەگرێت.

خامنەیی جەختی كردەوە "ئامادەیی تەواوی سەربازی پێویستییەكی حەتمییە بۆ بەرزترین ئاستی بەرپەرچدانەوە"، فەرمانیشی دا "هەر هەڕەشەیەك بە وەڵامێكی دەستبەجێ، كاریگەر و بێ ڕەچاوكردنی سنووری جوگرافی رووبەڕوو بكرێتەوە".
ڕێبەری ئێران هۆشداریشی دا، گەر دوژمنان هێرشە سەربازییەكانیان دەست پێبكەنەوە، ئەوا هێزە چەكدارەكان و گەلی ئێران خۆی كات و مەرجی كۆتاییهاتنی شەڕ دیاری دەكات.

 هاوكات بڕیار درا بانكی ئامانجەكان نوێ بكرێتەوە تاوەكو تەواوی بەرژەوەندییە سەربازی و ماددییەكانی ئەمریكا و قەوارەی ئیسرائیل بخرێنە بەر مەترسی و لەژێر چاودێری بن.
جیا لە ئاستی نێوخۆش، ڕێبەری باڵای ئێران ستایشی خۆڕاگریی بەرەی مقاوەمەی كرد و وتی: یەكگرتووی گۆرەپانەكان ڕۆڵێكی یەكلاكەرەوە لە داڕشتنی سیستمی نوێی سیاسی و ئەمنی لە ڕۆژاوای ئاسیا دەبینێت.

لە كۆبوونەوەكەدا، فەرماندە سەربازییەكان ڕاپۆرتیان لەسەر ئاستی ئامادەیی هێزەكانیان لە كەنداو، گەرووی هورمز و دەریای عومان لەگەڵ بەرزكردنەوەی بەرهەمهێنانی چەك و كەرەستەی سەربازی پێشكەش كرد.