مەرجە دژبەیەكەكان هەوڵەكانی قەتەر بۆ دانوستانی ئەمریكا و ئێران پەكدەخەن

پەیام  
سەرەڕای هەوڵەكانی دەوحە، داواكارییە دژبەیەكەكانی واشنتن و تاران گفتوگۆكانی نێوانیان بۆ كۆتاییهێنان بە شەڕ پەك دەخەن.
ماڵپەڕی «ئەكسیۆس»ی ئەمریكی ئاشكرای كرد، دوو داواكاریی دژبەیەك ڕێگری لە بەڕێوەچوونی دانوستانەكانی واشنتن و تاران دەكەن بۆ كۆتاییهێنان بە شەڕ، ئەمەش پاش ئەوەی شاندێكی نێوەندگیری قەتەری زیاتر لە 12 كاتژمێر لە تاران گفتوگۆیان ئەنجام دا.

ئیدارەی دۆناڵد ترەمپ پێداگری لەسەر سازشی ئەتۆمی لە لایەن ئێرانەوە دەكات بۆ دەستپێكردنەوەی دانوستان، تارانیش هەڵگرتنی گەمارۆی دەریایی ئەمریكا، ئازادكردنی پارە سڕكراوەكانی و فرۆشتنی نەوتی كردووەتە مەرج.
بەپێی ماڵپەڕەكە شاندی قەتەری هەوڵدەدات تاران ڕازی بكات بە سەردانی پشكێنەرانی نێودەوڵەتی بۆ ئەو بنكە ئەتۆمییانەی كە بۆردومان كراون، تا ببێتە هەنگاوێكی متمانەبەخش بۆ سووككردنی سزاكان و ڕێگریكردن لە شەڕ پێش هەڵبژاردنی نیوەی خول.

لەلایەكی دیكەوە، لە بازنەی نزیكی ترەمپدا ناكۆكی هەیە، پیت هێگسێت، وەزیری جەنگ و ماركۆ ڕوبیۆ، وەزیری دەرەوە گومانیان لە گەیشتن بە ڕێككەوتن هەیە و پشتیوانی لە لێدانی گورزی سەربازیی زیاتر دەكەن بۆ لاوازكردنی ئێران.
لە بەرانبەردا، جەی دی ڤانس جێگری سەرۆك و نێردەكانی ترەمپ لایەنگری دانوستانن، لە كاتێكدا وڵاتانی ناوچەكەش فشار لە تاران دەكەن تا بگەڕێتەوە سەر مێزی گفتوگۆ فەرمییەكان.