باڵیۆزخانەی ئەمریكا فەرمانی بە بەشێك لە كارمەندەكانی كردووە سعودیە بەجێبهێڵن

پەیام  
باڵیۆزخانەی ئەمریكا لە ڕیاز فەرمانی بە كارمەندە ناپێویستەكانی و خێزانەكانیان كرد بەهۆی مەترسییە ئەمنییەكانەوە خاكی سعودیە بەجێبهێڵن، ئەمەش وەك كاردانەوەیەك بەرامبەر هێرشە مووشەكی و درۆنییەكانی حوسییەكانی یەمەن بۆ سەر فڕۆكەخانە و ژێرخانە مەدەنییە سەرەكییەكان.
بەگوێرەی ئاگادارییە فەرمییەكەی باڵیۆزخانەی ئەمریكا لە ڕیاز، فەرمانی كشانەوەی كارمەندە ناپێویستەكان و كەسوكاریان لە 23ی تشرینی یەكەمەوە دەستیپێكردووە و ڕێوشوێنی توندی گەشتكردنیش گیراوەتەبەر؛ بە شێوەیەك كە كارمەندانی حكومەتی ئەمریكا بۆ بەكارهێنانی فڕۆكەخانەكانی سعودیە پێویستیان بە وەرگرتنی مۆڵەتی تایبەت دەبێت بەهۆی بەردەوامیی هێرشە مووشەكی و فڕۆكە بێفڕۆكەوانەكانەوە.

هەروەها باڵیۆزخانەكە هۆشداریی داوەتە تەواوی هاووڵاتیانی ئەمریكی لە شانشینەكە، سەبارەت بە ئەگەری ڕوودانی هێرشی چاوەڕوانكراوی زیاتر، داخرانی مەودای ئاسمانی، هەڵوەشاندنەوەی گەشتەكان و سەرهەڵدانی ئاستەنگی گەشتكردن.

ئەم گۆڕانكارییە ئەمنییانە لە كاتێكدا دێن كە پێكدادانەكان لە نێوان حوسییەكانی هاوپەیمانی ئێران و هاوپەیمانیی عەرەبی بە سەركردایەتیی سعودیە بۆ پشتگیریكردنی حكومەتی یەمەن بە توندی پەرەی سەندووە؛ ئەمەش وەك دروستبوونی بەرەیەكی نوێی ناسەقامگیر دادەنرێت لە چوارچێوەی شەڕی بەرفراوانی ئەمریكا و ئیسرائیل لە دژی كۆماری ئیسلامیی ئێران لە ناوچەكەدا.