عەباس عەراقچی: دانوستانەكان بەرەوپێشچوونیان بەخۆوە بینیوە

پەیام  
وەزیری دەرەوەی ئێران ڕایگەیاند دانوستانەكان لەگەڵ ئەمریكا بەرەوپێشچوونیان بەخۆوە بینیوە و دەرئەنجامی كۆتاییش پەیوەستە بە وەڵامی لایەنی بەرانبەرەوە.
لە لێدوانێكیدا بۆ میدیاكاران، عەباس عەراقچی، وەزیری دەرەوەی كۆماری ئیسلامیی ئێران ئاشكرای كرد كە وڵاتەكەی لە ڕێگەی نێوەندگیرە قەتەرییەكانەوە لە گفتوگۆی چڕ و بەردەوامدایە لەسەر خاڵە ناكۆكەكان.

ڕوونیشی كردەوە كە دانوستانە ناڕاستەوخۆكان لە چەند تەوەرێكدا پێشكەوتنیان بەدەست هێناوە، بەڵام پڕۆسەكە كاتی پێویستە و هێشتا نەگەیشتووەتە قۆناغی بڕیاردانی كۆتایی لەسەر تەواوی دۆسیەكان.
وەزیری دەرەوەی ئێران ئاشكرایشی كرد كە تاران هیوادارە لایەنی بەرانبەر بە دانایی و لۆژیكەوە مامەڵە لەگەڵ پێشنیازەكاندا بكات تاوەكو زەمینەی گەیشتن بە چارەسەر بڕەخسێت.

ئەو وتیشی: بەدیهێنانی ئەنجامی یەكلاكەرەوە و كۆتاییهێنان بە چەقبەستوویی گفتوگۆكان، بە تەواوەتی بەندە بەو وەڵامە فەرمییەی كە تاران تا چەند لایەنی بەرانبەر پەسەندی دەكات.