ئێران تەواوبوونی گرێبەستی سوخۆی 35ی ڕووسی و وەرگرتنی دوای جەنگ ڕاگەیاند

پەیام  
سوپای ئێران تەواوبوونی گرێبەستی كڕینی فڕۆكەی سوخۆی 35 ی رووسی و وەرگرتنی دوای جەنگ ئاشكرا دەكات.
لە چاوپێكەوتنێكدا عەمید محەمەد ئەكرەمی نیا، وتەبێژی سوپای ئێران (ئەرتەش) ئاشكرای كرد، سەرجەم ڕێكارە بەراییەكان و گرێبەستی كڕینی فڕۆكە جەنگییە پێشكەوتووەكانی «سوخۆی 35»ی ڕووسی، لەگەڵ تەواوكردنی مەشقی فڕۆكەوانەكان و ئامادەكارییە پەیوەندیدارەكان تەواو بوون.

ناوبراو ڕوونی كردەوە، هەوڵەكان بۆ كڕینی ئەم فڕۆكانە لەمێژە دەستیان پێكردووە و لە ڕێگەی لایەنی دەرەوەی سوپاوە بەڕێوەچوون.
هەروەها ئاماژەی كرد، بڕیار وابوو فڕۆكەكان پێش هەڵگیرسانی جەنگ بگەن، بەڵام ڕادەستكردنیان دواكەوت و هیوای خواست دوای كۆتاییهاتنی شەڕ وەریان بگرن.

وتەبێژی سوپا جەختی كردەوە نوێكردنەوەی هێزی ئاسمانی بەشێكە لە پلانی بەهێزكردنی بەرگری، هاوكات هێزی ئاسمانیی ئێران لەم جەنگە بە توانا و كەرەستەی زۆر پێشكەوتووترەوە دەردەچێت، ئامادەیی سەربازییشی نیشان دا و وتی: «ئێمە بۆ شەڕ لەگەڵ ئەمریكا ئامادەین و مەشقمان لەسەر كردووە».

سوخۆی 35 فرۆكەیەكی پێشكەوتووی ڕووسیی نەوەی چوارەمە و خاوەنی توانای بەرزی مانۆڕ و هەڵگرتنی مووشەكی پێشكەوتووی جۆراوجۆرە و خاوەنی دوو بزوێنەرە.
فڕۆكەكە مۆدێلی پەرەپێدراوی سوخۆی-27ە و لە ساڵی 2008 دوای نوێكردنەوەی،  هێزی ئاسمانیی ڕووسیا و سوپاكانی چین و ئەندەنووسیا داوای كڕینی ئەم فڕۆكە جەنگییەیان كرد.