عێراق بە حەوت مەرج ڕەزامەندیی لەسەر پشكی هەرێم لە بودجە دەدات

پەیام

شارەزایەكی ئابووریی عێراقی حەوت مەرجی حكوومەتی فیدڕاڵ بۆ ڕەزامەندییدان لەسەر پشكی هەرێمی كوردستان لە بودجەی ساڵی داهاتوو ئاشكرا دەكات.
نەبیل مەڕسوومی، شارەزای ئابووریی عێراقی ڕایگەیاند: حكوومەتی عێراق داوای یەكلاكردنەوەی شایستە داراییەكانی نێوان بەغداد و هەرێم لە ساڵانی 2004 بۆ 2026 دەكات كە بڕەكەی 12ترلیۆن و 750 ملیار دینارە و داوا دەكات حكومەتی هەرێم پابەند بێت بە هەناردەكردنی نەوت لە ڕێگەی كۆمپانیای سۆمۆ بۆ توركیا كە لە 400 هەزار بەرمیل نەوت لە ڕۆژێكدا كەمتر نەبێت.

لە نووسینێكیدا لە ئەژماری خۆی لە تۆڕی فەیسبووك، مەڕسوومی حەوت خاڵی وەك مەرجی حكوومەتی فیدڕاڵ بۆ بڕیاردان لە پشكی هەرێمی كوردستان لە بودجەی ساڵی داهاتوو ئاشكرا دەكات و ڕایدەگەیەنێت: بەپێی مەرجەكان داوا كراوە هەرێمی كوردستان داهاتی نانەوتی ڕادەست بكات و پابەند بێت بە ڕادەستكردنی بڕە غازی زیاد لەپێویست لە بەكارهێنانی نێوخۆیی.

لە خاڵی پێنجەمیشدا نووسیویەتی: نابێت حكومەتی هەرێم هیچ گرێبەستێكی وەبەرهێنان و نەوتیی لەگەڵ كۆمپانیا بیانی و نێوخۆییەكان واژوو بكات تەنیا لە ڕێگەی وەزارەتی نەوتی فیدڕاڵەوە نەبێت. خاڵی شەشەمیش ئاماژە بۆ ئەوە دەكات كە پشكی هەرێم %12.7 دەبێت نەك 14.14% .
لە كۆتا خاڵ و مەرجیشدا هاتووە "پشكی هەرێمی كوردستان بەپێی خەرجیی ڕاستەقینە دیاری دەكرێت، نەك خەرجی پلانبۆدانراو".