لە دوو ڕووداوی هاتوچۆدا 12 كەس لە پارێزگاكانی كەركووك و بەسرە گیانیان لەدەستدا

پەیام

لە ئاكامی ڕووداوێكی هاتوچۆ لەسەر ڕێگەی هەولێر ـ كەركووك ئێوارەی دوێنێ حەوت كەس گیانیان لەدەست دا، لە پارێزگای بەسرەش پێنج كەس بە هەمان هۆكار گیانیان لەدەستدا.
ڕووداوی یەكەم لە ئەنجامی پێكداكێشانی سێ ئۆتۆمبێل تۆیۆتا و پێكاب دێر و كادێلاكدا بووە و بەو هۆیەوە حەوت كەس گیانیان لەدەست داوە و چەند كەسێكی دیكەیش بریندار بوون.

بەپێی زانیارییەكان چوار كەس لەوانەی گیانیان لەدەست داوە خێزانێكی هەولێرن كە لە باوكێك و سێ كچەكەی پێكهاتوون، سیانەكەی دیكەش سەرنشینی ئوتومبێلەكانی دیكە بوون.
 ئەمە بە یەكەم ڕووداوی خوێناوی لەم شێوەیە لە پارێزگای كەركووك لەماوەی ئەمساڵدا دادەنرێت.

لەلایەكی دیكەوە، دوانیوەڕۆی دوێنێ لەسەر ڕێگەی شەتولعەرەب ـ بەسرە لە پارێزگای بەسرە، سەرجەم ئەندامانی خێزانێك كە لە پێنج كەس پێكهاتبوون لە ڕووداوێكی هاتوچۆدا گیانیان لەدەست دا.
ڕووداوەكە لەنێوان ئۆتۆمبێلێكی پیكاب و ماتۆڕێكی سێ تاییدا بووە كە بە (ستووتە) ناو دەبرێت، پیكابەكە خۆی بە ماتۆڕەكەدا كێشاوە و سەرجەم سەرنشینانی ماتۆڕەكە كە پێنج كەس بوون و ئەندامی یەك خێزان بوون، بریتی بوون لە دایكێك و چوار منداڵی گیانیان لەدەست داوە.

بەپێی زانیارییەكان منداڵەكان تەمەنیان لەنێوان 11 ساڵ تا پێنج ساڵدا بوون و دایكیشیان 34 ساڵ بووە.
هەر لەو ڕووداوەدا شۆفێری تۆیۆ پیكابەكەش بە قورسی بریندار بووە و ڕەوانەی نەخۆشخانەی فێركاریی بەسرە كراوە.
بەپێی هێڵكاری سەرەتایی هاتوچۆش بەرپرسیارێتی 70%ی ڕووداوەكە بەسەر ماتۆڕەكەدا دراوە.