ڕاپۆرتێكی دەرەكی: زیاتر لە هەزار خێزان لە لافاوەكەی هەولێر زیانیان بەر كەوتووە

پەیام

ڕاپۆرتێك لەبارەی زیانەكانی لافاوەكەی هەولێر بڵاو كرایەوە و دەركەوتووە زیاتر لە هەزار خێزان زیانیان بەر كەوتووە، باس لە بێسەروشونێبوونی چەند كەسێكیش دەكرێت.
بەپێی ڕاپۆرتێكی هاوبەشی مانگی سووری عێراقی و فیدڕاسیۆنی نێودەوڵەتیی خاچی سوور و مانگی سوور، ئەو شەپۆلە بارانە بەخوڕەی حەوتی ئەم مانگە هەولێری گرتەوە و بووە هۆی دروستبوونی لافاو، تیایدا دوو كەس گیانیان لەدەست دا و پێنج كەسی دیكەیش بێسەروشوێن بوون و 300 كەس بریندار بوون، یان پێویستیان بە فریاگوزاریی پزیشكی بووە.

لە ڕاپۆرتەكەدا باس لەوە كراوە لە لافاوەكەی هەولێردا هەزار و 46 خێزان زیانیان بەر كەوتووە، هەروەها 466 دووكان و 190 ئۆتۆمبێل تووشی زیان بوون، یان لافاو بردوونی.
بەپێی ڕاپۆرتە هاوبەشەكەی مانگی سووری عێراقی و فیدڕاسیۆنی نێودەوڵەتیی خاچی سوور و مانگی سوور زۆرینەی ئەو ماڵانەی زیانیشیان بەر كەوتووە لە گەڕەكەكانی لەنگە، شێخەڵڵا، شێخ ئەحمەد، بوون.

ئەمەو تائێستا لایەنە پەیوەندیدارەكانی حكوومەتی ماوەبەسەرچوو و حكوومەتی خۆجێیی هەولێر هیچ ئامارێكی فەڕمی و وردی زیانەكانی لافاوەكەی هەولێریان بڵاو نەكردووەتەوە.