سەرەڕای ئاگربەست، 25 كەسی دیكە لە غەززە بوونە قوربانی

پەیام

سەرەڕای ئاگربەست، لە هێرشەكانی دوێنێی سوپای قەوارەی زایۆنی بۆ سەر كەرتی غەززە پێنج كەس شەهید و نزیكەی 20ی دیكەیش بریندار بوون.
لە بەردەوامیی پێشێلكارییەكانی ئاگربەستدا، دوێنێ سوپای زایۆنی زنجیرەیەك هێرش و پێشێلكاری بۆ سەر كەرتی غەززە ئەنجام دایەوە و بەپێی سەرچاوە پزیشكییەكان و شایەتحاڵەكان پێنج فەڵەستینی شەهید و نزیكەی 20ی دیكەیش بریندار بوون.

لە دێر بەلەح لە باكوور، تۆپبارانی سوپای قەوارەی زایۆنی بۆ سەر تاوەرەكانی نیشتەجێبوونی قەستەل نزیك پرسەیەك دوو كەسی شەهید بوون كە یەكێكیان ژن بوو و لانی كەم 10 كەسی دیكە بریندار بوون.
 لە گەڕەكی توفاحیش كەسێك كوژرا و ژنێكی بەتەمەن و كوڕەكەیشی بریندار بوون.

هەر لە باكوور، لە بەیت لاهیا و فالووجەش دوو كەس بریندار بوون كە یەكێكیان منداڵە، لە زەیتوونیش درۆن ماڵانی بۆردومان كرد و كەناراوەكانی غەززەش گولـلەباران و تۆپباران كران.
لە خان یونس لە باشووری كەرتەكە بە فڕۆكەی بێفڕۆكەوان كەسێك شەهید بوو و پێنجی كەس بریندار بوون، لە مەواسی ڕەفەحیش كچێك بە گولـلە بە سەختی بریندار بوو.

هاوكات ئەمڕۆ گەنجێك شەهید بوو كە پێشتر لە بۆردومانی سەر نەخۆشخانەی ناسڕ-ی خان یونس بریندار بووبوو، بەمەش ژمارەی شەهیدانی هێرشەكەی گەیاندە پێنج كەس.
بەپێی داتاكانی وەزارەتی تەندروستیی كەرتی غەززە، پێشێلكارییەكانی ئاگربەست بوونەتە هۆی شەهیدبوونی هەزار و 622 فەڵەستینی و برینداربوونی پێنج هەزار و  878 كەسی دیكە لەو كاتەی لە 10ی 10ی 2025 ەوە ڕاگەیەنراوە.