هێرشكردنە سەر نەوتهەڵگرەكان كارەساتێكی ژینگەیی بەرفراوانی لە كەنداو ناوەتەوە

پەیام

ڕۆژنامەیەكی بەریتانی هۆشداری دەدات كە هێرشكردنە سەر نەوتهەڵگرەكان كارەساتێكی ژینگەیی بەرفراوانی لە كەنداو و گەرووی هورمزدا ناوەتەوە.
لە ڕاپۆرتێكیدا، ڕۆژنامەی گاردیان هۆشداری دەدات كە جەنگی ئەمریكا و ئێران كارەساتێكی ژینگەیی لە گەرووی هورمز، كەنداو و دەریای عەرەب لێ كەوتووەتەوە.

ڕۆژنامەكە نووسیویەتی: دوای هێرشی مووشەكی و مینی دەریایی دژی دەیان نەوتهەڵگر لە 28ی شوباتەوە،  وێنەكانی مانگە دەستكردەكان پەڵەی نەوتی گەورەیان دەرخستووە كە لە بۆشایی ئاسمانەوە دەبینێرن و هەڕەشەن بۆ كەناراوەكان و دۆلفین، كیسەڵ، ماسی و باڵندە دەریاییەكانیش.

گاردیان لە زاری ڕێكخراوی ئاشتی سەوزەوە گواستوویەتییەوە "سەروو 500 دزەكردنی نەوت بە ڕووبەری نزیكەی 20 هەزار كیلۆمەتر چوارگۆشە كە (هاوتای وێڵز-ە)و سەروو 133 هێرشی سەر نەوتهەڵگرەكان تۆمار كراون".
بەپێی ڕاپۆرتەكەی ڕۆژنامەی گاردیان مانگی ڕابردوویش مەترسیدارترین مانگ بووە بە سەروو 30 هێرشی پشتڕاستكراوە، یان ڕاگەیەنراو لە هورمز و دەوروبەری.

ڕۆژنامەكە دیاریكردنی بەرپرسیارێتی بەشێوەیەكی ورد بە سەخت دەزانێت، ئەوەیش بەهۆی بەردەوامیی شەڕ، گەمارۆی دەریایی و كۆتوبەندی سەر توێژەران و چالاكان.
هاوتەریب لەگەڵ تۆمەتباركردنی ئێران بە زۆربەی هێرشەكان، ئاماژەش بە لێدانی كەشتیی ئێرانی لەلایەن ئەمریكا و هێرشی ئیمارات بۆ كۆگاكانی نەوتی دوورگەی لاڤان دەكات كە بەپێی وۆڵ ستریت جۆرناڵ گەورەترین دزەكردنی لێ كەوتووەتەوە.