06/09/2025
269 جار خوێنراوەتەوە
سەرۆكی ئەمریكا بە فەرمی ناوی "وەزارەتی بەرگری"ی بۆ "وەزارەتی جەنگ" گۆڕی
پەیام
دۆناڵد ترەمپ بە فەرمی ناوی وەزارەتی بەرگریی ئەمریكای بۆ وەزارەتی جەنگ گۆڕی و داوای لە كۆنگرێس كرد ڕێكاری پێویست بگرێتە بەر.
شەوی ڕابردوو سەرۆكی ویلایەتە یەكگرتووەكانی ئەمریكا فەرمانێكی سەرۆكایەتیی واژوو كرد بۆ گۆڕینی ناوی وەزارەتی بەرگری )ناسراو بە پنتاگۆن( بۆ وەزارەتی جەنگ، ڕاشیگەیاند: هەنگاوی نوێمان بۆ دووبارە داڕشتنەوەی پەیكەری وەزارەتەكە گرتووەتە بەر.
ترەمپ ڕأشیگەیاند: فەرمانەكەی واژوو كردووە و داوا لە كۆنگرێسی ئەمریكا دەكەین بۆ ئەوەی ڕێكاری یاسایی پێویست بۆ ناوگۆڕینەكە و جێبەجێكردنی بڕیارەكە بگرێتە بەر.
دوای ترەمپیش، بیت هیگیس، وەزیری بەرگریی ئەمریكا بە ڕۆژنامەوانانی وت: لەمەودوا وەك وەزیری جەنگ بۆتان دەدوێم. وتیشی: بابەتەكە تەنیا ناوگۆڕین نییە، بەڵكو زیندووكرنەوەی كەلتوری جەنگاوەرییە.
ڕاستەوخۆ دوای چەند خولەكێك لە واژووكردنی بڕیارەكە فەرمانبەرانی پنتاگۆن دەستیان بە گۆڕینی ناوی وەزارەتەكە لەناو نووسینگە و بارەگای سەرەكیی سوپای ئەمریكادا بۆ وەزارەتی جەنگ گۆڕی.
وەزارەتی بەرگریی ئەمریكا "پنتاگۆن" تا ساڵی 1947 بەناوی وەزارەتی جەنگەوە ناسرابوو، بەڵام كۆنگرێس لەدوای جەنگی جیهانیی دووەم و سەركەوتنی ئەمریكاوە سوپا و هێزەدەریایی و ئاسمانییەكانی یەك خست و ناوی نا وەزارەتی بەرگری. دۆناڵد ترەمپیش ڕایگەیاند: نامەوێ تەنیا لە سەنگەری بەرگرییدا بم، بەڵكو دەمەوێت هێرشبەریش بم، ئەمە بۆ ئێستای جیهان گونجاوترە!
لە تۆڕە کۆمەڵایەتیەکان شەیری بکە