ئەمریكا كەشتیی فڕۆكەهەڵگر و فڕۆكەی جەنگی لە سنوورەكانی فەنزویلا نزیككردووەتەوە

پەیام 

ئەمریكا دەیان كەشتی فڕۆكەهەڵگر و فڕۆكەی جەنگی لە سنوورەكانی فەنزوێلا نزیككردوەتەوە و سەرۆكی ئەو وڵاتەش لە كۆنگرەیەكی رۆژنامەوانیدا هۆكارەكەی ڕوون كردەوە. 

میدیاكانی ئەمریكا بڵاویان كردەوە، 10 فڕۆكەی جەنگی ئەمریكی لە جۆری "F-35" لە پۆرتۆ ڕیكۆ نیشتوونەتەوە، كە تەنها 550 میل لە ڤەنزوێلاوە دوورە. لە هەمان كاتدا، كەشتیی هەڵگری فڕۆكەی "یو ئێس ئێس ئایۆ جیما" بۆ هەمان شوێن ئاڕاستە كراوە.

لەبارەی هۆكاری جووڵەی هێزەكانی ئەمریكا بۆ نزیك فەنزوێلا، دۆناڵد ترەمپ، سەرۆكی ئەمریكا، باسی هێرشی سەربازی یان ڕەتكردنەوەی نەكرد و تەنها وتی: "خۆتان بۆتان دەردەكەوێت بۆچی هێزمان جووڵاندووە".

ئاستی گرژییەكان لە ڕۆژانی ڕابردوودا زیاتر بوون، پاشئەوەی وەزارەتی بەرگری ئەمریكا (پێنتاگۆن) ڕایگەیاند، كە دوو فڕۆكەی سەربازیی ڤەنزوێلی ڕۆژی پێنجشەممەی ڕابردوو بەسەر كەشتییەكی هێزی دەریایی ئەمریكادا فڕیون، و هۆشداری دایە كاراكاس لە هەر زیادبوونێكی تر لە گرژییەكان.

ترەمپ، سێشەممە، ڕایگەیاند، هێزەكانی ئەمریكا لە دەریای كاریبی هێرشیان كردووەتە سەر بەلەمێكی پڕ لە ماددەی هۆشبەر، كە لە ڤەنزوێلاوە بەرەو ویلایەتە یەكگرتووەكان بەڕێكەوتبوو، هێرشەکەش بووە هۆی كوژرانی 11 بازرگانی ماددەی هۆشبەر، کە ئەندامی گروپێكی سەر بە نیكۆلاس مادۆرۆ، سەرۆكی ڤەنزوێلان.