ڕاوێژكارێكی سوودانی: حكومەت دەیەوێت داهاتی نانەوتی بگەیەنێتە لەسەدا 20

پەیام 

ڕاوێژكارێكی سوودانی ڕایدەگەیەنێت حكومەت پلانی هەیە بۆ بەرزكردنەوەی داهاتی نانەوتی بۆ ڕێژەی لەسەدا 20ی كۆی داهاتەكان.

حەموودی لامی، ڕاوێژكاری سەرۆكوەزیرانی عێراق بۆ كاروباری پیشەسازی و گەشەپێدان و كەرتی تایبەت ڕایگەیاند، لە 15 ڕۆژی داهاتوودا پێگەیەكی نوێ بۆ دروستكردنی پرۆژەی پیشەسازی دروست دەكرێت، كە لەڕێگەیەوە دەتوانرێت لەماوەی تەنیا 15 ڕۆژدا مۆڵەتی دروستكردنی پرۆژەی پیشەسازی تەواو بكرێت كە پێشتر دوو بۆ سێ ساڵ پێ دەچوو.

حەموودی لامی دەڵێت: قەبارەی وەبەرهێنان تا ئێستا گەیشتووەتە 102 ملیار دۆلار، ئامانجی حكومەتی عێراقیش ئەوەیە تا ساڵی 2030 لەڕێی پرۆژەی گەشەپێدانەوە كۆی وەبەرهێنان بگەیەنێـتە 450 ملیار دۆلار.

ئەو ڕاوێژكارەی سوودانی ئاماژەی بەوەش داوە، زۆرینەی وەبەرهێنانی كەرتی تایبەت لە دەرەوەی عێراق دەكرێن یان لە بانكەكاندا بلۆك كراون، هەر بۆیە تا ئێستاش وەبەرهێنانی پێویست لە پیشەسازیدا نەكراوە كە پێویستی بە چوار یان پێنج ساڵە بۆ ئەوەی بگاتە بەرهەمهێنان، سێ ساڵیشی پێویستە بۆ ئەوەی بگاتە قازانج. حكومەت لە ڕێگەی هاندانی دروستكردنی پرۆژەی پیشەسازییەوە دەیەوێت قەبارەی داهاتی نانەوتی بگەیەنێـە لەسەدا 20.