کوردو قەرەوێڵەکەی پرۆكۆس

 
یەکەم:

ئەم دۆخە بۆ کورد وه‌ک وه‌ک مه‌سه‌له‌ی قه‌ره‌ویڵه‌که‌ی پرۆکۆسی لێهاتووه‌، ئه‌گه‌ر قاچی له‌ قه‌ره‌وێڵه‌که‌ درێژ تربێت، هه‌ردووکی بۆ ده‌بڕنه‌وه‌و ئه‌گه‌ر قاچیشی به‌ قیاسی قه‌ره‌وێڵه‌که‌ نه‌بێت ئه‌مه‌نده‌ بۆی راده‌کێشن تا جومگه‌کانی ده‌رده‌چێت..

ئەگەر باسی (سەربەخۆیی)و (خۆسەری)و (خۆ بەرێوبەری) بکەیت، هەموو دنیا گەلەکۆمەکێت لێدەکەن و قاچت دەبڕنەوە، ئەگەر دائەنیشیت و حەقی ھیچت نابێت، بەزۆری زۆر داری و بۆ پاکتاوی حساباتی خۆیان، ئەمەندەت رادەکێشن، تا هەموو ژیان و ژیارت تێکدەدەن و لە سنورەکانەوە رۆژێک حەشدی شەعبیت تێبەردەدەن و رۆژێک بەرەی نوسرە و رۆژێک داعش..

 دووەم:
"هەر میلەتێک ئاگای لە مێژووی خۆی نەبێت مەحکومە بە دوبارە کردنەوەی هەڵەکانی"
مێژووی نەتەوەییمان سەلماندویەتی، دەوڵەت نە لە (مهاباد)و قامیشلی و هەولێر و دیاربەکر دروست دەکرێت، نە توانای دژایەتی کردنیشی لە ئەستۆی خۆماندایە، ئەزموون پێیوتین دەوڵەتی کوردی نە بە هەڵپەرکێ و جەواز سوتاندن دروست بوو و، نە وەهمی "له برى جيهان شه‌ڕكردن"، نە بە وتار و رەخنەی رۆژنامەو بەرنامەی تەلەفزیۆنی و فەیسبووک ره‌دەکرێتەوە، دروستکردن و روخاندنی دەوڵەتان، کاری دەزگا موخابەراتییە گەورەکانی جیهانە..
 
سێیەم:
لەدوای کۆتایی هاتنی دووم جەنگی جیهانی، دنیا لەسەر دەستی براوەکانی ئەو جەنگە دەڕوات بەرێوە، تاکە رەگەزی نزیکبوونەوە لە سینتراڵ یان چەقی (ژیان و ژیار)ی ئەو دەوڵەتانە یان (ئایدۆلۆژیا)بووە، یان (ماتریاڵ)، وەلێ جیهان لە ئاستی ئێمەدا لەو پەڕی بێڕەوشتی و بێویژدانیدایە، هەموو دنیا پشتی لە ئێمە کردووە، نە ئیمانداریەکەمان لە لای هاودینەکانمان و دەوڵەتانی عەرەبی شەفاعەتی بۆ کردووین،
نە بێ دینی و نە ئەستێرە سوری سەر کاسکێت و لاقۆڵی شەڕکەرەکانمان، لە لای بلۆکی سۆسیالیستی و دەوڵەتانی وەک روسیا و چین شەفاعەتیان بۆ کردووین..

نە کۆمپانیا عیملاقەکانی وەکو (ئیکسۆن مۆبێل) و (شیفرۆن) و (بریتیش ئۆیل) و (تۆتال) نە پێدانی نرخی نەوت بە نرخی تۆڵەکە بە دەوڵەتە سەرمایەداریەکانی وەک ئەمریکاو بەریتانیاو فەڕەنسا بوونە شفاعەتکارمان..
  
چوارەم:
ساڵانە سەدان هەزار تەن باروت و ئاگر بە سەر میلەتانی رۆژهەڵاتی ناوەراست و باشوری رۆژهەڵاتی ئاسیا دەبارێنن، وەلێ لە خوێن و گۆشت و دەماغی پرژاوی خەڵکی ئەم ناوچەیە، بەهەشتێکیان بۆ خۆیان بونیادناوە و ناویان ناوە (دنیای دیموکراسی) بەهۆی گەمارۆکانیانەوە، سەدان هەزار مرۆڤ لە ئەفریکا و لاتین ئەمریکا، ساڵانە یان بە مەشلولی و کەمئەندامی لە دایکدەبن، یان لەبەردەم هەڕەشەی مردندان بۆ لەتێ نان و پەرداخێک ئاو..
حوکومەتەکانیان کە دڵخوازی زۆرینەیانن، ئاگر بەسەر ئەم ناوچانەدا دەبارێنن بە هۆی (لوعبەی موخابەراتییەکانیان)، کەچی رێکخراوەکانیان ساڵانە چەند ملیۆن دۆلارێک لەو حکومەتانە وەردەگرن و دێن بۆ ئێمەی ئەدەن بە خێمە و جانتا و کابینە و خەستەخانەی گەڕۆک، "خانوەکانمان بۆ دەڕوخێنن و کەچی بەناوی ئینساندۆستیەوە، دێن خێمەمان بۆ دروستدەکەن"..

نوقتە سەری دێڕ ....
تێبینی:
نە لیڤڵی عاتیفەم فڕیوە و نە حەماوەی ناسیۆنالیستیم بەرزبووه‌تەوەو نە بڕوام بە راسیزم و رەگەزپەرستی هەیە، بەڵام شێرکۆ بێکەس وتەنی "دنیا بە باڵای ئەم کۆستەی خۆم ئەپێوم لەهەر کوێوە، یان هەر کەسێ فرمێسکێکی بۆ ناردبم، ئەیخەمە چاوی رۆحمەوە و تا هەتایە هەڵیدەگرم، ئەوەی یەک قسەی کردبێت بۆ ئەم هۆڵۆکۆستی غەدرە، من سەد پەیڤی خۆشەویستی بۆ دەنێرم"، هەر کەسێکیش خۆی لە بینینی ئازارەکانم لادابێت، نە پێی سەرسام دەبم و نە گوێشی بۆ رادەدێرم..