بەناوی دیموکراسیەوە چیان نەکرد ؟

هەرچی دارستانە سوتاندیان و ناویان لێنا (کشتوکاڵی مۆدێرن)، دۆلفین و شەمپازیان لە ژینگەکەی خۆی جیاکردەوە و ناویان لێنا نمایش و سێرک و سەرگەرمی و کۆبونەوەی شەوانە)، عاجی فیلیان لە ئەفریقا نەهێشت و ناویان لێنا (بازرگانی) ، شاخی کەرکەدەنیان بڕیەوە و ناویان لێنا (زانستی پزیشکی) ، ڕم و تیریان کرد بەسەر پشتی (گا) کاندا و ناویان لێنا (وەرزش)، تەوقی کۆیلایەتیان کردە ملی ملیۆنان ئینسانی ئەفریکی و ناویان لێنا (هەلی کار)، بەسەدان هەزار تەن لە قرژاڵی بەدبەخت و ئەختەبوت و ڕۆبیانی بنی بنەوەی دەریا ساردەکانیان دەرهێنا و لە رێستۆرانتەکانیان بە شەرابی سورەوە دەیخۆن و ناویان لێناوە (پیشەسازی).

ملیۆنان تەن باڵندە و ئاژەڵ سەردەبڕن و لە خواردەنەکانی وەک (کەی ئێف سی) و (هۆت دۆگ) و (پیزا) بەکاری دەهێنن کەچی ناویان لێناوە مارکە و براندی جیهانی، پەلاماری بۆشایی ئاسمانیشیان داوە و تەنانەت ناهێڵن بونەوەری ئاسمانیش ئیسراحەت بکات کەچی ناویان ناوە (زانست و دۆزینەوە و ئیکتیشاف)، پێستی مار و تیمساح و هەرچی خشۆکی دنیا هەیە لێیان کردەوە و کردیان بەجانتا و پێڵا و قایش و ناویان لێناوە(مارکێتین).

ئێستاش، هەرچی بێڕەوشتی هەیە بەرامبەر بە مرۆڤی ئەم سەردەمە و ئێمەی ئەکەن و بە لەیزەر ئەیانسوتێنن و بۆمبیان بەسەر دەبارێنن و دڕکە پەتکی مناڵەکانیان وەک دڕکی ماسی لە گۆشتەکەی جیا ئەکەنەوە و کەچی وەک ھەموو بێ رەوشتیەکانی تریان ناویان لێناوە (سیاسەت)، کە خزمەتی سەربازی خۆیان تەواو دەکەن لە ووڵاتێکی تر هەرچی (سەگ و پشیلە و گوێدرێژێک کە بەقەولی خۆیان یارمەتیان داون) وەک رێزلێنانێک لەگەڵ خۆیان دەیبەنەوە ، بەڵام سەدان و هەزاران مرۆڤ لەبەر دەم دوژمنەکانیان جێ دەهێڵن تا بەقەمە و چەقۆ کەوڵ بکرێن و پێستیان لە گۆشتیان جیابکرێتەوە.

هەر پێشکەوتنێک، هەر ئارامیەک هەر ماچێک لە تەنیشت سەعاتەکەی لەندەن دەکرێت، هەر ژوانێک بە ئارامی لە تایم سکوێر دەبەسترێت، هەر پێکێک شەراب لە کریملن و پاریس و سیدنی و تۆرینتۆ و بەرلین هەڵئەدرێت، لەسەر خوێن و گۆشت و ئێسکی ئەو منداڵانەیە کە لە هەڵەبجە و عەفرین و حەلەب و گەرمیان و یەمەن و هێرۆشیما هەتا ئێستاش بەھۆی بۆمبەکانی ئەوان بە کەمئەندامی لەدایک دەبن.
نوقتە سەری دێڕ ...

تێبینی:-

*سەد جار لە دەست ئازار و پۆخڵەواتی کورد بوون ناڵاندومانە و تا ئەوسەری دنیا رامانکردووە ، وەلێ کورد بوون لە سەد و یەک شوێنەوە بانگمان دەکات و دەڵێت (بە تەنھا جێم مەھێڵن)
مادام دنیا ئەوەندە بێ رەوشتە بە رامبەر بە ئێمە ، ئێمەش ھەرگیز ناتوانین کورد بوون جێبھێڵین بە ھەموو ئازار و برین و پۆخڵەواتەکانیشیەوە

*پرد و رێگاو بان و وێستگەی کارەباکان بە (ئێف ١٦) وێران دەکەن و دواتر رێکخراوی کۆمەڵی مەدەنی دەنێرن لایت شەحن و مۆلیدە تەوزیع ئەکەن بۆ رۆشنبوونەی فیکرمان ھاھاھاھاھاھا
ھێمنی موکریانی دەڵێ (کار لە شیوەن تێپەریوە پێکەنینە دەمگرێنێ)