ڕۆشنبیریی تاکی سیاسیی کوردی

قسەکردن لەبارەی ڕۆشنایی تاکی کۆمەڵگە بۆ بەهێزکردنی کایەکانی سیاسی و ڕۆشنبیری و ئەکادیمی و بیرکردنەوەیەکی تەندروست بۆ بونیادنانی دەستوور و پڕۆگرامێکی گونجاو و شیاو، کە لەسێبەریدا کۆمەڵێک بیروبۆچوون کۆبکاتەوە، بەتیگەیشتنی دەقە پیرۆزەکانی ئیسلام کار و هیممەتێکی بێوچانی دەوێت بۆ بەرقەرارکردنی ئەو پێگە سیاسی و ستراتیژییەی هەر کەسێک بیەوێت بە عەقڵێكی ئیسلامییەوە لەناو کۆمەڵگەدا ژیان گوزەر بکات، دەربارەی ئەو پرسیارانەی باس لە کۆمەڵگەیەکی هۆشیار دەکەن بۆ ئایندەیەکی پڕشنگدار؛ پێویست دەکات کار لەسەر تاکی کۆمەڵگە بکرێت، کە بەگوێرەی عەقڵ و دابونەریتەکانیەوە پلان و بەرنامەی بۆ دابنرێت بۆ ئەو نەریتە چەقبەستووانەی لەناخی تاکدا مەلاس دراون و چەسپاون بە بیرکردنەوەیەکی تێنەگەیشتوو، بۆیە خەڵک هۆشیارکردنەوە لەو کایەیەوە دەنرێت پەیامە ئیسلامییەکە هاوپێچ بکرێت لەگەڵ ڕۆشنبیرییەکی زانایان و بیرمەندانی ئەو ئایینە.

بەگشتی لەناوچە نەخوێندەوار و کەمئەزموونەکان و ڕۆژهەڵاتی ناوەراست (کە بەداخەوە ئەو چەمکەی بەسەردا سەپێنراوە و پێی دەناسرێتەوە) ئاستی بیرکردنەوەی تاکەکان ناهۆشیارییەکی تەواوی پێوە دیارە، تا ترۆپکی بێهیوایی و پەنگخواردنەوەی هزر و ئەندێشە و سەرقاڵبوون بەو بیروبۆچوونانەی ئیستراک دەکرێت بۆ وڵاتە تازەپێگەیشتووەکان و دواکەوتووەکان ئەو چەمکانە لەوێ تاقیدەکرێنەوە، ئا لەوێدا شکست دەست پێدەکات.

بەدرێژایی بوونی کورد و ئەو نەتەوانەی ژێردەستەبوون، یاخود قبوڵی ژێردەستەییان دەکرد حاڵی ژیانی سیاسی و پێشکەوتنیان ناڕۆشن بووە لەپێناو پارە و کورسی و سامان خەنجەریان لەپشتی کوڕ و برا و برازا و مام و خاڵ و خاڵۆزای یەکتر داوە، هەندێجاریش دەستیان بۆ دوژمن درێژکردووە بۆ دەستکەوتێک و مانەوەیان بە ئەندازەی ئەوە پاداشتیان پێدراوە.

دیرۆکی کوردی و نەتەوەکانی تری ژێردەستە لە ڕۆژهەڵاتی ناوەڕاست ئاستێکی پێوانەییمان بۆ دەگێڕنەوە لەم مێژووە پڕ لە ناسۆری و دوور لە ژیانێکی برایانە و دۆستانە، بەڵکو تیر و شیر و چەکیان لەسەر سنگی یەکتربووە بۆ هێنانەدی خواستە تایبەتیەکان و دوورخستنەوەی ئەو هەڕەشانەی کار لەسەر نەمانی بەرژەوەندیەکان دەکەن و هەوڵی لەناوبردنی دراوە.

وڵاتە زلهێزەکان و میرنیشینە کوردیەکان و حزبی سیاسی و... دەیەها گروپی تر مێژوویەکیان هەیە ئەوەندە نامۆیە لەگەڵ ئەو دابونەریتە باوانەی کە لە پێناس و شوناسی سیاسی و ئەدەبی سیاسەتمەداردا هاتووە، بەشێوەیەک لەقاڵبدانی ئەو هەستەی تاکی کورد و بەئاڕاستە ڕۆیشتنی تا گەیشتن بەخاڵی ناکۆکی بەهێز لەنێوان جەمسەرەکانی دوو بنەماڵە ودوو کارەکتەرو دوو سیاسی و دوو حزب کۆی بەرژەوەندیە نیشتمانیەکانیان ئاوەژوو کردووەتەوە، هەرچی ئەدەبدۆست و ڕۆناکبیر و مێژوونووس هەن کەوتوونەتە پەراوێز و هیچیان بیروبۆچوونە ڕەسەنەکانیان نەخوێنراوەتەوە، ئەو نەریتە خێڵەکیانەی تا ئێستا زاڵن بەسەر کلتورو سیاسەت و ڕۆشنبیری تاک بەتاکی کۆمەڵگە و ناهێڵن گۆڕانکاری بە مەودایەکی درێژ هەنگاو بنێت و پێشکەوتنی سیاسی و فکری و هەموو ئەو چەمکانەی کۆک و تەبان لەگەڵ ئایین و داب و نەریتە نەتەوەییەکان بەهۆی ئەو دەستوورە خێڵەکیانەوە لەباربراون و پێگەی تاک بەرەو ئاڕاستەی نادیار بردووە، چونکە بەهۆیەوە دەست و پێی ئەو کارەکتەرانەی بەستووەتەوە، کە دەیانەوێ جوڵەبکەن و خەبات لەپێناو بەدیهێنانی کەش و هەوایەکی عەقڵانی و مامەڵەیەکی تەندروست بۆ دۆخە جیاوازەکان و قەیرانە جۆر بەخۆرەکان بدۆزنەوە.
گرنگە خاوەن فکر و پڕۆژە جوانەکانی هەر کایەیەکی سیاسی بێت، یاخود حزبی بێت، یاخود ڕۆشنگەریی بێت، بەو مانایەکی چەمکە سیاسیەکان بەپێوانەیەکی شەرعی لەناخی ئیسلامدا بەرجەستە بێت و لەقاڵبی سیاسەتدا بیان توێنێتەوە، ئەوکاتە دەبێتە ڕووئیایەکی ڕۆشن و پاراوو بێ خڵت بۆ ئایندەدیارێکی کاری سیاسی و پڕۆژەی دوورمەودا و مانەوە لەسایەی دەستوور و پەیڕەوێکی ناخێڵەکی.
لەکۆتایدا دەکرێت ئەوەش بڵێین هەر کاتیک عەقڵ بەرگەی ووتارو فکرو بیری ڕەسەنی نەکرد، کە هەڵێنجراوی ئیسلام و سوننە بێت، ئەستەمە بتوانرێت ئەو دەوروبەرە بەئاسانی بگۆڕدرێت، کە تاکەکانی وەک پەتێکی ئەستوور دەستیان بەو نەریتە ناتێگەیشتووانەوە گرتووە، بەئاسانی دەستبەرداری نابن، بەڵکو هەوڵدانێکی بێوێنەی دەوێت، ئەگەرنا ئەوە خێری بۆ خۆی و دەوروبەرەکەیی و بەرامبەرەکانی نیەو دەبێت فاتیحەی لەسەر بخوێنرێت.

هێدی هەولێری