عێراق.. پێشنیازی پێكهێنانی وەزارەتێک دەکرێت كە گرنگی بە بواری ژیریی دەستكرد بدات

پەیام 

پێشنیازی پێكهێنانی وەزارەت، یان دەستەیەكی سەربەخۆ لە عێراق دەكرێت كە گرنگی بە بواری ژیریی دەستكرد بدات.

لە ڕاگەیەنراوێكدا ویسام حەدمل ئەلحەلو، بەڕێوەبەری ناوەندی سیاسیی و ئابووریی عێراق دەڵێ: دوای ڕاگەیاندنی ئەنجامەكانی سەرژمێری كە لە مانگەدا بەڕێوە دەچێت، پێكهێنانی وەزارەت، یان دەستەیەكی سەربەخۆ تایبەت بە ژیریی دەستكرد بەتایبەت لە بوارەكانی پەروەردە، فێركردن، ئابووری و سەرجەم كەرتەكانی بازرگانی و پیشەسازی و وەبەرهێنان، زۆر پێویستە.

ئەو شارەزا عێراقییە ئاماژەی بەوەش داوە "دەكرێت ژیریی دەستكرد لە بواری ئینتەرنێت، كۆمپانیاكانی پەیوەندی، كەرتی گەشتیاری، بانكەكان، پارەدانی ئەلكترۆنی، كۆمپانیاكان، دڵنیایی و هەموو بوارێكدا، بۆ بەرەوپێشبردنی عێراق هاوكار بێت".

بەڕێوەبەری ناوەندی سیاسیی و ئابوریی عێراق ژیریی دەستكردی بە (چەكی دوو دەم) ناو هێناوە كە بەپێی بەكارهێنان سوودەكەی دەگۆڕێت، ڕایشیگەیاندووە: دامەزراوەكانی دەوڵەت دەتوانن لەپێناو پاراستنی ئاسایشی وڵات لە بوارە جیاوازەكاندا وەبەرهێنان لەم كەرتەدا بكەن.

ژیریی دەستكرد دوایین داهێنان و بەرەوپێشبردنی تەكنەلۆژیایە لە جیهاندا و چەند ساڵێكە بەرەوپێشچوونەكەی هێندە بەرچاوە لای بەشێك لە وڵاتەكان و لەپێناو كۆنتڕۆڵكردنیدا دامەزراوە و دەستەی تایبەتیان بۆ دروست كردووە.