بەهۆی پشووەكانەوە، چەندین بابەت لە پرۆگرامەكانی خوێندنی پۆلەكانی نۆ و 12 بۆ تاقیكردنەوەكان كەم كرانەوە

پەیام

بەهۆی زۆری پشووە فەرمییەكانەوە، پرۆگرامەكانی خوێندن بۆ پۆلەكانی نۆی بنەڕەتی و 12ی ئامادەیی لە هەرێمی كوردستان كەم كرانەوە.

لە نووسراوێكدا كە ئاڕاستەی سەرجەم بەڕێوەبەراتییە گشتییەكانی لە پارێزگا و ئیدارە سەربەخۆكان كراوە، وەزارەتی پەروەردەی حكومەتی ماوەبەسەرچووی هەرێمی كوردستان بڕیاری داوە بە كەمكردنەوەی چەند بابەتێك لە  تاقیكرنەوەكانی پۆلی 12ی ئامادەیی بۆ هەردوو بەشی زانستی و وێژەیی و پۆلی نۆی ببنەڕەتی.

لە نووسراوە هاوپێچەكاندا هاتووە كە بۆ پۆلی 12ی ئامادەیی لە وانەی زمان و ئەدەبی كوردیدا چوار بابەت و لە زمانی ئینگلیزی سێ بابەت و لە زمانی عەرەبی بۆ خوێندنی عەرەبی دوو بابەت و بۆ خوێندنی كوردییش یەك بابەت داواكراو نین.

هەروەها لە وانەكانی بیركاریی زانسی سێ بابەت و بیركاری وێژەیی بابەتێك و زیندەزانی و كیمیا و فیزیایش یەكی دوو بابەت لادراون.

هاوكات لە وانەكانی مێژوو و جوگرافیا، یەكی دوو بابەت و لە ئابووری نوێ و ئابووری كۆنیش یەكی بابەتێك لا دراوە.
هەرچی پۆلی نۆی بنەڕەتیشە لە تەواوی وانەكاندا بۆ هەردوو وەرزەكە چەندین وانە كەم كراونەتەوە و بۆ تاقیكرنەوەی نیشتمانی داواكراو نابن.

لە نووسراوەكەدا ئاماژ بەوەیش كراوە ئەو بابەتانەی كە كەم كراونەتەوە تەنیا بۆ تاقیكردنەوە گشتییەكانی خولی یەكەم و دووەمی ساڵی خوێندنی 2024 ـ 2025 دەبێت.