ئەڵمانیاو فەڕەنساو بەریتانیا داوا دەكەن بەپەلە ئاگربەستی غەززە دەستپێبكاتەوە

پەیام 

هەر یەك لە ئەڵمانیا، فەڕەنسا و بەریتانیا داوا دەكەن بەپەلە ئاگربەستی غەززە دەست پێبكاتەوە و هێرشەكانی قەوارەی زایۆنی ڕابوەستێت. جەختیش دەكەنەوە لەوەی، شۆك بوون بە كوژرانی خەڵكی مەدەنی لە كەرتی غەززە.

وەزارەتی دەرەوەی ئەو سێ وڵاتە ڕایانگەیاندووە: دەستپێكردنەوەی هێرشەكانی ئیسڕائیل بۆ سەر غەززە بۆ دانیشتووانی كەرتەكە و دیلەكان و تەواوی ڕۆژهەڵاتی ناوەڕاست كارەساتبارە، هەر بۆیە داوا لە سەرجەم لایەنەكان دەكەین بگەڕێنەوە بۆ دانوستان بۆ بەدەستهێنانی ڕێككەوتنی ئاگربەستی هەمیشەیی و تەواوەتی لە غەززە.

ئەڵمانیا و فەڕەنسا و بەڕیتانیا ئاماژەیان بەوە داوە، هەست بە شۆكێكی قووڵ دەكەن بەهۆی ڕووداوی بەئامانجگرتنی باڵەخانەیەكی سەر بە نەتەوە یەكگرتووەكان لە غەززە، ڕاشیدەگەیەنن: پێویستە لەسەر ئیسڕائیل بە تەواوی ڕێز لە یاسای نێودەوڵەتی بگرێت و ڕێگە بدات هاوكاری بەپەلە بگاتە خەڵكی غەززە.
لە ڕاگەیەنراوی ئەو سێ وڵاتە ئەورووپیەدا هاتووە: ئاگربەست تاكەڕێیە بۆ ئاشتیی هەمیشەیی و چارەسەری دوودەوڵەتی و دووبارە بونیادنانەوەی غەززە.