05/04/2025
718 جار خوێنراوەتەوە
حكومەتی عێراق داوای قەدەغەكردنی تیكتۆكی پێشكەش بە پەڕلەمان كردووە
پەیام
حكومەتی عێراق بە فەرمی داواكاریی قەدەغەكردنی تیكتۆكی پێشكەش بە پەڕلەمان كردووە.
هیام یاسری، وەزیری پەیوەندییەكانی عێراق ئاماژەی بە گرنگترین پڕۆژەكانی وەزارەتەكەی لە ساڵی 2025ـدا دا و ڕایگەیاند: لە دیارترین پێشینەی كارمان بۆ ساڵی 2025 بریتیە لە تەواوكردنی مۆڵەتی نیشتیمانی بۆ مۆبایل بە تەكنەلۆژیای نەوەی پێنجەم، هەروەها بڵاوكردنەوەی كێبڵی پێشكەوتوو و گەیاندنی بە زۆرترین ژمارەی بەكارهێنەرانی ئینتەرنێت لە عێراقدا، ئەمەش بۆ كۆتاییهێنان بە پەخشی ئینتەرنێت بە وای فای، هەروەها خێراكردنی هێَڵی ئینتەرنێت.
لە لێدوانێكی بۆ میدیای فەڕمی، وەزیری پەیوەندییەكانی عێراق ڕایشیگەیاند: پێشتر بە فەرمی داوای قەدەغەكردنی تۆڕی تیكتۆكمان پێشكەش كردبوو، ئەمەش دوای گەیشتنی هەزاران داوا لەلایەن خێزانەكانی عێراقەوە بۆ لەكارخستن و قەدەغەكردنی ئەو بەرنامەیە، چونكە شتی زۆری تێدایە كە لە ئاستی گەلەكەمان و خێزانەكانماندا نییە.
هیام یاسری دەڵێ: قەدەغەكردنی تیكتۆك تەنیا بڕیاری حكومەت نییە، داوامان پێشكەش كردووە، بەڵام هێشتا وەڵاممان وەرنەگرتووە، چاوەڕێی ئەنجوومەنی نوێنەرانین بۆ ئەوەی لەوبارەیەوە بڕیار بدات و ئێمەش جێبەجێی دەكەین.
لە تۆڕە کۆمەڵایەتیەکان شەیری بکە