لە مانگی تەمووزەوە مامەڵەی كاشی دراو لە فەرمانگەكانی عێراقدا نامێنێت

پەیام

حكومەتی فیدڕاڵی عێراق بڕیاری داوە لە مانگی تەمووزی ئەمساڵەوە تەواوی مامەڵە داراییەكان لە فەرمانگە حكومییەكاندا بكات بە ئەلیكترۆنی و مامەڵەی كاش نەهێڵێت.

ساڵح سڵێمان، ڕاوێژكاری دارایی سەرۆكوەزیرانی عێراق ڕایگەیاندووە، بەپێی بڕیاری حكومەت، لە یەكی تەمووزی ئەمساڵەوە لە فەرمانگە و دامودەزگاكانی حكومەتدا مامەڵەی كاش نامێنێت و، كۆی مامەڵە داراییەكان لە ڕێگای ئەلیكترۆنی و بە كارت دەبێت.

هەروەها راشیگەیاندووە، ئەو هەنگاوەی حكومەتی فیدڕاڵی، لە پێناو بەرزكردنەوەی ئاستی مامەڵەی دارایی و نەهێشتنی مامەڵەی كاشە لە وڵاتدا.

ڕاوێژكارەكەی سەرۆكوەزیران تیشكی خستە سەر هەنگاوەكانی دیكەی حكومەت و ڕایگەیاند، حكومەتی فیدڕاڵی ڕێكەوتنی لەگەڵ كۆمپانیای "ئیرنست وینگ" كردووە بۆ دووبارە بونیاتنانەوەی پەیكەری حەوت بانكی حكومیی عێراقی لە ناویاندا بانكی ڕافیدەین و  ڕەشید.

هەروەها راشیگەیاندووە، بانكی تی بی ئای (بانكی بازرگانی عێراقی)ـیش لەلایەن هەریەكە لە كۆمپانیاكانی "كەی تو ئای" و هەروەها كۆمپانیای "كەی پی ئێم جی" دووبارە رێكدەخرێتەوە بەو شێوەیەی لەگەڵ ڕێنماییە نێودەوڵەتییەكاندا بگونجێت.