كرملن: ڕووسیا ده‌ستپێشخه‌رییه‌كی بۆ كۆتایی هێنان به‌ جه‌نگی ئێران خستوه‌ته‌ ڕوو

په‌یام

کۆشکی کرێملین ڕایگەیاند کە ڤلادیمێر پۆتین، سەرۆکی ڕووسیا، لە پێوەندییەکی تەلەفۆنیدا کۆمەڵێک پێشنیاری تایبەت بە چارەسەرکردنی تەنگژەی ئێرانی خستووەتە بەردەم دۆناڵد ترەمپ، سەرۆکی ئەمریکا.

دیمیتری پێسکۆڤ، وتەبێژی سەرۆکایەتیی ڕووسیا، ئاماژەی بەوە کرد کە وڵاتەکەی لە نزیکەوە چاوەدێریی پرۆسەی گەیشتن بە ڕێککەوتن دەکات، بەڵام جەختی کردەوە کە کرێملین وردەکارییەکانی ئەو پێشنیارانە بۆ ڕای گشتی ئاشکرا ناکات.

سەبارەت بە ڕۆڵی ڕووسیا لەم کێشەیەدا، پێسکۆڤ ڕوونی کردەوە کە گفتوگۆکانی نێوان پۆتین و ترەمپ بەو مانایە نایەت کە پۆتین بووەتە نێوەندگیر لە هەوڵەکانی چارەسەریدا.

وتەبێژەکە ئاماژەی بەوە دا کە ڕووسیا ئامادەیە هاوکار بێت بۆ کەمکردنەوەی گرژییەکان لە ڕۆژهەڵاتی ناوەڕاست، بەڵام ئەم هەنگاوە پێویستی بە هەماهەنگی لەگەڵ لایەنە جیاوازەکان هەیە.

هەروەها باسی لەوە کرد کە پرسی سزا و سنووردارکردنی هەناردەی نەوتی ڕووسیا بە وردی باس نەکراوە، هەرچەندە لێکەوتە نەرێنییەکانی ئەو سزایانە ڕوونن.

لە بەرانبەردا، دۆناڵد ترەمپ پێوەندییە تەلەفۆنییەکەی لەگەڵ پۆتین بە «زۆر باش» وەسف کرد و ئاماژەی بەوە دا کە سەرۆکی ڕووسیا خواستی خۆی بۆ هاوکاریکردن لە پرسی ئێران نیشان داوە.

ترەمپ لە کۆنفرانسێکی ڕۆژنامەوانیدا ڕایگەیاند کە بە پۆتینی وتووە دەتوانێت «سوودبەخشتر» بێت ئەگەر کۆتایی بە جەنگی نێوان ئۆکرانیا و ڕووسیا بهێنێت، چونکە ئەوە دەبێتە هەنگاوێکی گرنگتر بۆ سەقامگیری.

ئەم گفتوگۆیانە لە کاتێکدایە کە ڤلادیمێر پۆتین هۆشداری دابوو کە جەنگی ئەمریکا و ئیسرائیل دژی ئێران بووەتە هۆی تەنگژەیەکی وزەی جیهانی.

پۆتین ئاماژەی بەوەش کردبوو کە مەترسییەکی جیدی لەسەر بەرهەمهێنانی نەوت هەیە کە لە ڕێگەی گەرووی هورمزەوە دەگوازرێتەوە و ئەگەری هەیە لە داهاتوویەکی نزیکدا ئەو پرۆسەیە پەکبکەوێت.

هاوکات مۆسکۆ ڕەتیکردەوە هیچ لێدوانێک لەسەر ئەو دەنگۆیانە بدات کە باس لە دزەکردنی زانیاریی هەواڵگری بۆ ئێران دەکەن.