ئێران: ئەمریكا باجی هەنگاوە سەربازییەكانی لە دژی ئێران دەدات

پەیام 

شەوی ڕابردوو سوپای ئێران چەند مووشەكێكی ئاڕاستەی ناوچە جیاوازەكانی قەوارەی زایۆنی كرد و هاوكات هەڕەشەی بەئامانجگرتنی بنكە سەربازییەكانی ئەمریكا لە ناوچەكەدا دەكات.

وتەبێژی بارەگای خاتەمولئەنبیا لە تاران رایگەیاند، لێكەوتەی خراپ چاوەڕێی بەرژەوەندییەكانی ئەمریكا و بنكە و بارەگا سەربازییەكانی دەكات لە ناوچەكەدا، پاش ئەوەی هێرشی كردە سەر بنكە ئەتۆمییەكانی ئێران.

بارەگاكە رایگەیاندووە، ئەمریكا دەستی بە جەنگ كرد لە دژی ئێران، بەڵام ئێران كۆتایی بە جەنگەكە دەهێنێت.

هاوكات، ئیسماعیل بەقائی، وتەبێژی وەزارەتی دەرەوەی ئێران رایگەیاند، ئەمریكا دەبێت باجی هەنگاوە سەربازییەكانی بدات، هەروەها وتیشی، كەس نازانێت كە سبەی چی ڕوودەدات، بەڵام ئەوەی ڕوونە ئەوەیە كە دەبێت ئەمریكا و قەوارەی زایۆنی باجی كردەوەكانیان بدەن.

بەقائی وتیشی، ئێمە مافی ڕەوای خۆمانە كە بەرگری لە خۆمان بكەین، هەر ئەوەش دەكەین و سەر نەوی ناكەین.

لەگەڵ ئەوەشدا، ئەمیر حاتەمی، فەرماندەیەكی باڵای سوپای ئێران رایگەیاند، هەر كاتێ ئەمریكییەكان هەڵەیەكیان كردبێت باجەكەیان داوە، ئەمجارەش هەر وا دەبێت.

حاتەمی وتیشی، ئەمریكا دەستی سەربازەكانمانی واڵا كرد بۆ بە ئامانجگرتنی بنكە و بەرژەوەندییەكانیان لە ناوچەكەدا.