ئیسرائیل داوای چۆڵكردنی دەیان گەڕەك لە خانیونس دەكات كە هەزاران ئاوارەی تێدایە

پەیام 

قەوارەی  داگیركەری زایۆنی هۆشدارییەكی دەستبەجێی بۆ چۆڵكردنی چەند گەڕەكێك لە خان یونس لە باشووری كەرتی غەززە دەركردووە و وەزارەتی ناوخۆ لە كەرتەكەش دەڵێت ئەو ناوچانە هەزاران ئاوارە و كەمپ و نەخۆشخانەی لێیە.

ئەفیخای ئەدرەعی، وتەبێژی سوپای داگیركەری زایۆنی لە پۆستێكدا لەسەر پلاتفۆرمی ئێكس بڵاویكردوەتەوە: "هەموو دانیشتوانی ناوچەی خان یونس لە بلۆكی 107، 108، 109، 110، 111، 112 و بەشی ڕۆژهەڵاتی بلۆكی 88 دەبێت دەستبەجێ چۆڵی بكەن و ئەو ناوچانەی وەك ناوچەی جەنگ و مەترسیدار ناو بردووە.
وتەبێژەكەی سوپای داگیركەر داوای لە فەلەستینییەكانی ئەو ناوچانە كردووە بەرەو ڕۆژئاوا و ناوچەی مەواسی لە كەناراوەكانی كەرتەكە بڕۆن، كە ئەو ناوچەیەش پڕە لە ئاوارە و توانای جێگیركردن و لەخۆگرتنی ئاوارەی دیكەی نییە. 

عەلی ئەبو ڕیزق ڕۆژنامەنووسی فەلەستینی لە كەرتی غەززە گواستییەوە، ئەو ناوچانەی داگیركەر داوای كردووە چۆڵبكرێن، زۆربەیان ناوچەی ئاوارە و ئەو ناوچانەن كە دەیان قوتابخانە و كەمپی ئاوارەیی تێدایە.

ئەبو ڕیزق ئاماژە بەوە دەكات نەخۆشخانەی ناسر كە خزمەت بە دەیان هەزار كەس دەكات، لە نێو ناوچەكانی چۆڵكردندایە. تاكە نەخۆشخانەی ناوەندییە كە كاردەكات لە شارەكەدا.