ئیلۆن ماسك حزبێكی نوێی بە ناوی "پارتی ئەمریكا" دامەزراند

پەیام

ئیلۆن ماسك ملیاردێری ئەمریكی دوای جیابوونەوەی لە دۆناڵد تڕەمپ، پێكهێنانی حزبێكی بەناوی "پارتی ئەمریكا" ڕاگەیاند.

ماسك كە لە ماوەی ڕابردوودا كەوتە ناكۆكی لەگەڵ دۆناڵد تڕەمپ سەرۆكی ئەمریكا، ڕۆژێك دوای ئەوەی لە تویتەر داوای بۆچوونی جەماوەری كردبوو لە بارەی پێكهێنانی پارتێكی سیاسی، لە پۆستێكی نوێدا لە هەژمارەكەی خۆیدا پێكهێنانی حزبێكی بەناوی "پارتی ئەمریكا" ڕاگەیاند.

ماسك ڕایگەیاند: پێی وایە نیوەی هاووڵاتیانی ئەمریكا حزبێكی سیاسیان دەوێت، وتیشی: ئەمڕۆ پارتی ئەمریكا دادەمەزرێت بۆ ئەوەی ئازادیتان بۆ بگێڕێتەوە.

ئەم ڕاگەیاندنەی ماسك دوای ڕۆژێك دێت لە واژۆكردنی پڕۆژە یاسای كەمكردنەوەی باج، لەلایەن دۆناڵد ترەمپ، سەرۆك ئەمریكا، یاسایەك كە ماسك هاوپەیمانی پێشووی ترەمپ بە توندی دژی ئەو یاسایە بوو.

ئیلۆن ماسك ڕۆڵێكی گەورەی بینی لە پاڵپشتیكردنی دۆناڵد تڕەمپ لە كاتی هەڵبژاردنەكاندا و بە دابینكردنی خەرجی بۆ بانگەشەكانی، دواتر بووە ڕاوێژكاری سەرۆكی نوێی ئەمریكا بەر لەوەی پەیوەندیەكانیان ئاڵۆز بێت و ئیدارەكە جێبهێڵێت.