پارتی كرێكارانی بەریتانیا داوا لە وەزیری دەرەوەیان دەکەن بەپەلە دان بە دەوڵەتی فەڵەستیندا بنێت

پەیام 

پەرلەمانتارانی پارتی كرێكارانی بەریتانیا داوای دانپێدانانی بەپەلە بە فەڵەستین لە وەزیری دەرەوەی شانشینەكەیان دەكەن.

ڕۆژنامەی گاردیان بڵاوی كردووەتەوە ئەمڕۆ پەرلەمانتارانی پارتی كرێكارانی بەریتانیا نامەیەكیان ئاڕاستەی دیڤید لاوی وەزیری دەرەوەی شانشینە یەكگرتووەكانی بەریتانیا كردووە و داوایان لێكردووە دەستبەجێ دان بە دەوڵەتی فەڵەستندا بنێت.

رۆژنامەكە ئاماژەی بەوە كردووە نامەكە لەلایەن 60 ئەندامی پارتی كرێكارانەوە واژوو كراوە، ئەوەیش ڕەنگدانەوەی ڕەوتێكی بەهێزە لە ناوخۆی پارتەكەدا بۆ گۆڕانكاری سیاسەتی بەریتانیا لەبارەی كێشەكانی نێوان قەوارەی زایۆنی و فەڵەستینییەكاندا.

پەرلەمانتارەكان داوایان كردووە حكومەتی بەریتانیا بە فەرمی دان سەربەخۆیی فەڵەستیندا وەك وڵاتێكی خاوەن سەروەری بنێت و جەختیش لەوە كراوەتەوە كە ئەو دانپێدانانە لەگەڵ هەوڵەكان بۆ ئاشتی و یاسا نێودەوڵەتییەكان یەك دەگرێتەوە.

نامەكەی پارتی كرێكاران لە كاتێكدایە كە ناوچەكەدا هێشتا جەنگ و ئاڵۆزی و كۆمەڵكوژییەكان بەردەوامییان هەیە و فشارە نێودەوڵەتییەكانیش لەسەر وڵاتانی ڕۆژاوا درێژەیان هەیە بۆ ئەوەی هەڵوێستێكی ڕوون لەبارەی فەڵەستینییەوە بنوێنن، لەگەڵ ئەوەیش كە حكومەتی بەریتانیا پشتویانی لە چارەسەری دوو دەوڵەتی دەكات بەڵام، هیشتا دانی بە فەڵەستنیدا نەناوە.

بڕیاریشە ڕۆژانی 28 و 29ی ئەم مانگە كۆڕبەندێكی نەتەوەی یەكگرتووەكان لەبارەی چارەسەری دوو دەوڵەتی بە سەرپەرشتی فەرەنسا و سعودیە بەڕێوە بچێت.