ژمارەی گیانلەدەستدان لە ڕووداوی ئاگرکەوتنەوەکەی شاری کوت بەرزبووەوە بۆ ٦١ کەس

وەزارەتی ناوخۆی عێراق ڕایگەیاند، ژمارەی ئەو کەسانەی کە بەھۆی ڕووداوی ئاگرکەوتنەوە لە مۆڵی بازرگانی "ھایپەرمارکێت" لە شاری کوت سەنتەری پارێزگای واست گیانیان لەدەستداوە، بەرزبووەتەوە بۆ ٦١ کەس و ئاماژەی بەوەشدا کە لیژنەیەکی تایبەت بۆ لێکۆڵینەوە لە ڕووداوەکە پێکھێنراوە.
وەزارەتەکە لە ڕاگەیاندراوێکدا ئاماژەی بەوەداوە کە لە ڕووداوی ئاگرکەوتنەوەکە لە مۆڵی بازرگانی "ھایپەرمارکێت" لە شاری کوت، ٦١ کەس گیانیان لەدەستداوە و ٤٥ کەسی دیکەش ڕزگارکراون، هەروەها ١٤ تەرم بەهۆی سووتانەوە، نەناسراونەتەوە.
ڕاشیگەیاندووە کە لەسەر فەرمانی وەزیری ناوخۆ، عەبدولئەمیر شممەری لیژنەیەکی تایبەت بۆ لێکۆڵینەوە لە ڕووداوەکە پێکھێنراوە و جەختی لەوەش کردووەتەوە کە بەھیچ شێوەیەک درێغی ناکرێت لە لێپرسینەوە لە ھەر کەسێک کە سەلمێندرا کەمتەرخەمبووە لە ڕووداوەکە.
ئاماژەی بەوەشداوە کە ھەر کاتێک لێکۆڵینەوە لە ڕووداوکە تەواوبوو، ئەوا ئەنجامەکەی بۆ ڕای گشتیی ڕادەگەیەنن.
پێشتر پارێزگاری واست محەمەد جەمیل مەیاحی ڕایگەیاندبوو ئاگرێکی گەورە لە مۆڵی بازرگانی "ھایپەرمارکێت" لە شاری کوت سەنتەری پارێزگاکەدا کەوتووەتەوە و لە ئاکامدا، ٥٠ کەس گیانیان لەدەستداوە.