دی بڕۆین هۆکاری پەیوەندیکردنی بە ناپۆلییەوە ڕوون دەکاتەوە

پەیام سپۆڕت - مەڕوان تاڵیب

کیڤن دی بڕۆینی بەلجیکی هۆکاری پەیوەندیکردنی بە ڕیزەکانی ناپۆلی ئیتاڵییەوە ڕوون دەکاتەوە.

 لەمیانەی کۆنگرەیەکی ڕۆژنامەوانیدا و ناساندنی یاریزانەکە و پێدانی درێسی ژمارە 11، دی بڕۆین وتی: لە ڕوانگەی ڕکابەرییەوە ناپۆلی باشترین جێگەیە بۆ من، وەرزی ڕابردوو هەمووان بینیان چی کرد، ئەم ئاڵنگارییەش بە تەواوی لە پرێمەرلیگ جیاواز دەبێت، چونکە هێشتا هەست دەکەم دەتوانم لە باشترین ئاستی خۆمدا یاری بکەم.

کیڤن دەشڵێت: پێموایە خولی ئیتاڵی زۆر ڕکابەرییە و تیپی بەهێزی زۆرن، ئەمە جگەی لەوەی ناپۆلی لە چامپیۆنسلیگ و جامی ئیتاڵیاش بەشداری هەیە.

ئەو یاریزانە نوێیەی یانەکەی باشووری ئیتاڵیا ئاماژە بەوەش دەکات، پێشنیازی ناپۆلی هەر لە سەرەتاوە بۆی ڕکابەریکردن بووە لەسەر نازناوەکان و دواتر پەیوەندی بە لوکاکۆ و مێرتێنسەوە کردووە بۆ ئەوەی لە بارەی چوونی بۆ ناپۆلییەوە قسەیان لەگەڵ بکات.

لە کۆتایدا سەبارەت بەوەی لە مەشقەکاندا درێسی ژمارە 10ی پێدراوە و ئێستاش ژمارە 11، دی بڕۆین ئەوەی خستەڕوو، کە سەرەتا سەری سوڕماوە کە درێسی ژمارە 10ی وەرگرتووە، چونکە ئەو ژمارەیەی ماڕادۆنا هەڵگیراوە، بەڵام پێیوایە دیێگۆ ئەفسانەیە و مێژووی بۆ ناپۆلی نووسیووەتەوە.