یاریزانێکی ڕیاڵ مەدرید گرێبەستێکی چوار یانەی ڕەت کردووەتەوە

پەیام سپۆڕت - مەڕوان تاڵیب

گۆنزالۆ گارسیای هێرشبەری لاوی ڕیاڵ مەدرید گرێبەستی چوار یانەی ڕەت کردووەتەوە و نایەوێت بڕوات.

 ڕۆژنامەی ئاسی ئیسپانی ئاشکرای کردووە، هێرشبەرە لاوەکە پێداگری لەسەر مانەوە دەکات، سەرەڕای ئەو ئۆفەرە زۆرانەی پێشکەشی کراوە، دوای درەوشانەوەی لە مۆندیالی یانەکان و بوونە گۆڵکاری جامەکە.

سەرچاوەکە ئاماژە بەوەش دەدات، لە ئێستادا بەرپرسانی یانە شاهانەییەکە لەگڵ بریکارەکەی گارسیا گفتوگۆ لەسەر گرێبەستێکی نوێ دەکەن، یاریزانەکە بیر لە هیچ بژاردەیەکی دیکە ناکاتەوە و لەگەڵ ئەوەشدا داوای گرەنتی یاریکردنی بۆ وەرزی نوێ نەکردووە و تەنیا دەیەوێت ڕکابەری پێگەی سەرەکی بکات.

لە کۆتایدا ئاس ڕایگەیاندووە، مەرجێک لە گرێبەستی گۆنزالۆ گارسیا هەیە کە ڕێگەی پێدەدات بە نزیکەی 50 ملیۆن یۆرۆ بڕوات، لەکاتێکدا سێ یانەی پرێمەرلیگ و یانەیەکی ئیتاڵی هەوڵی گواستنەوەیان داوە، بەڵام هێرشبەرەکە مانەوەی هەڵبژاردووە.