لە پلانى داگیرکردنى غـ.ەززەدا 80 هەزار سەربازى ئیسرائیلى بەشداردەبن

پەیام

هاوكات لەگەڵ خۆپیشاندانی ملیۆنیدا دژی داگیركردنی كەرتی غەززە، وەزیری بەرگریی قەوارەی زایۆنی پلان بۆ ئەوە دادەنێت، 80 هەزار سەرباز لە ئابڵوقەدان و داگیركردنی غەززە بەشدار دەبن.

ماڵپەڕی واڵای ئیسڕائیلی بڵاویكردووەتەوە، پلانى داگیركردنی كەرتی غەززە بەرفراوانە و ئامانجیەتی زیانی گەورە لە بزووتنەوەی حەماس بدات بەڵام هاوكات مەترسیی بەرچاو ڕووبەڕووی سوپای زایۆنی دەكاتەوە.

بەپێی ماڵپەڕەكە، یسرائیل كاتس، وەزیری بەرگریی قەوارەكە ڕایگەیاندووە، 80 هەزار سەرباز بەشداری لە ئابڵۆقەدانی نوێی غەززە و پلانی كۆنترۆڵكردنی كەرتەكە دەكەن.

هاوكات دەستەی پەخشی زایۆنی بڵاوی كردووەتەوە، پلانی ڕاگواستنی خەڵكی غەززە خراوەتە بەردەم لایەنی ئەمریكی و گفتوگۆی لەسەر كراوە.

بەپێی زانیارییەكان پلانی داگیركردنی غەززە پێكدێت لە چەند قۆناغێك و تیایدا چەند كەمپێك دروست دەكرێت و خەڵكی غەززەی تێدا كۆدەكرێتەوە، لە ماوەی چەند هەفتەیەكیشدا تەواوی خەڵكی غەززە دەگوازرێنەوە و هێزە سەربازییەكان بەشێوەی فراوانتر دەچنە ناوەوە، هەروەها پرۆسەی داگیركردنەكە بە شێوازێكی لەسەرخۆ و قۆناغ بە قۆناغ بەڕێوە دەچێت.

داگیركردنی غەززە لەلایەن قەوارەی زایۆنییەوە كاردانەوەی بەرفراوانی ناوخۆیی و جیهانیی بەدوای خۆیدا هێنا بەڵام قەوارە داگیركەركە بە پشتیوانیی راستەوخۆی ئەمریكا بەردەوامە لە پلانەكانی و گوێ بە ناڕەزایەتی و بۆچوونی جیهان نادات.

دوێنێش زیاتر لە یەك ملیۆن كەس لە چوارچێوەی مانگرتن و ناڕەزایەتی گشتی كە لەلایەن بنەماڵەی دیلەكان و سەربازە كوژراوەكان بانگەوازی بۆ كرابوو، لە قەوارەی زایۆنی خۆپیشاندانیان ئەنجامدا.