ژمارەی خێزانە ئاوارەكان لە كـەمپەكانی هەرێم بۆ 21 هەزار خێزان دابەزیوە

پەیام 

وەزارەتی كۆچ و كۆچبەرانی عێراق رایگەیاندووە، دوای پڕۆسەی گەڕانەوەی خۆبەخشانەی ئاوارەكانی ناوخۆ، ژمارەی خێزانە ئاوارەبووەكان لە كـەمپەكانی هەرێم بۆ 21 هەزار خێزان دابەزیوە.
 
عەلی عەباس جەهاگیر، وتەبێژی وەزارەتی كۆچ و كۆچبەرانی عێراق رایگەیاندووە، ژمارەی خێزانە ئاوارەبووەكانی لە كەمپەكانی هەرێم كەمیكردووە ئەوەش دوای ئەوەی هەزاران خێزانی ئاوارە لە كەمپەكانی هەرێمی كوردستانەوە گەڕانەوە زێدی خۆیان.

وەزارەتەكە پێشتر ئاماری ئاوارەكانی بڵاوكردبوەوە و رایگەیاندبوو، كە ژمارەی خێزانە ئاوارەبووەكانی هەرێم 39 هەزار كەسی تێپەڕاندووە كە لە 176 هەزار و 341 كەس پێكهاتوون، ئەم ژمارەیەش ئاوارەی كەمپەكان و ناوچەكانی دیكەی ناو كوردستان دەگرتەوە، بەڵام ئێستا ژمارەكە بۆ 21 هەزار خێزان دابەزیوە.

وتەبێژی وەزارەتی كۆچ و كۆچبەرانی عێراق راشیگەیاندووە، ڕێكخراو و لایەنە پەیوەندیدارەكان هەڵمەتی هۆشیاریی لەسەر گەڕانەوەی خۆبەخشانەی ئاوارەكان بەڕێوەدەبەن، جگە لە دۆزینەوەی میكانیزمی چارەسەر بۆ ئەو تەحەددایانەی كە لە كاتی گەڕانەوەی ئاوارەكان بۆ ناوچە ڕەسەنەكانی خۆیان دروستدەبن.